Mexíkósk kjúklingasúpa
Í blaði á dögunum rakst ég á þessa skemmtilegu uppskrift frá matar- eða saumaklúbbi á Akranesi. Ég prófaði hana fljótlega – og súpan reyndist einstaklega bragðgóð.
Neðst í uppskriftinni stóð falleg setning sem mér fannst vert að halda til haga:
„Þessi súpa gleður mig mjög mikið og mér finnst ótrúlega huggulegt að standa við eldavélina og dúlla mér við súpugerð. Ilmurinn sem fyllir heimilið á meðan er dásamlegur.“
Súpan er örlítið sterk, svo gott er að smakka hana til og stilla styrkleikann eftir smekk.
— MEXÍKÓ — SÚPUR — KJÚKLINGUR — AKRANES —
.
Mexíkósk kjúklingasúpa
4 kjúklingabringur
3 paprikur (rauð, gul og græn)
2 gulrætur
½ blaðlaukur
2 hvítlauksgeirar
1 laukur
½ rauður chili, fræhreinsaður og saxaður smátt
5 msk góð olía
2 dósir saxaðir tómatar
1 dós tómatpúrra
1,5 l vatn
kjúklingakraftur eftir smekk
2–3 msk karrý
¼ l rjómi
200 g Philadelphia rjómaostur með sweet chili
salt og pipar
Hitið olíu á pönnu við vægan hita. Saxið paprikur, gulrætur, blaðlauk, hvítlauk og lauk smátt og steikið grænmetið stutta stund þar til það byrjar að mýkjast.
Setjið grænmetið í stóran pott. Bætið vatni, tómatpúrru, söxuðum tómötum, karrí og kjúklingakrafti saman við og látið malla á meðan kjúklingurinn er undirbúinn.
Skerið kjúklingabringurnar í litla bita og steikið þær á pönnu í smá olíu. Kryddið með kjúklingakryddi, salti og pipar.
Setjið kjúklinginn út í súpuna og látið hana sjóða við vægan hita í um 10–15 mínútur.
Að lokum er rjóma og rjómaosti hrært saman við og súpan hituð þar til osturinn hefur bráðnað og súpan orðið silkimjúk.
Súpan er sérstaklega góð borin fram með: sýrðum rjóma, rifnum osti, nachos-flögum
Hver og einn getur síðan bætt þessu á sinn disk eftir smekk.
–
— MEXÍKÓ — SÚPUR — KJÚKLINGUR — AKRANES —
–
Takk fyrir þessa,-guðdóttir þín er lengi búin að suða um svona súpu- nú rætist ósk hennar.
Gaman að heyra, gangi ykkur vel að dúlla ykkur við súpugerðina 😉
Mexíkóska kjúklingasúpan sló í gegn á námskeiði hjá mér um helgina. Mjög góð – takk minn kæri 🙂
Gaman að heyra 🙂
Hvað skyldi þessi uppskrift sörvera marga mallakúta?
Comments are closed.