Guðmundur Örn frændi minn fermdist í dymbilvikunni. Hann stóð sig með mikilli prýði, flutti stutta ræðu og bauð gesti velkomna. Í veislunni gekk hann milli borða og spjallaði við gesti. Mamman fékk fólk til að leggja hönd á plóg; undirbúa salinn, leggja á borð, sjá um eldhúsið, útbúa veitingar, ganga um beina, ganga frá og annað slíkt. Stórfínt fyrirkomulag.
Í annarri veislu sem við fórum í hélt fermingarbarnið líka ræðu, síðan söng hann og var með spurningakeppni. Spurningar snérust allar um hann sjálfan. Frábær hugmynd, ekki var bara skemmtigildið mikið, því í leiðinni var þetta upplýsandi fyrir þá sem minna þekktu til.
Döðlugott með lakkrís
500 g döðlur saxaðar smátt
250 g smjör
120 g púðursykur
5-6 bollar rice crispies
400 g rjómasúkkulaði
2 pokar lakkrískurl
Döðlur og smjör brætt saman í potti. Púðursykurinn er bræddur með þangað til döðlurnar eru orðnar mjúkar.
Blandið Rice crispies og lakkrískurli saman við og setjið í form í frysti í 10 mín.
Bræðið súkkulaðið yfir vatnsbaði. Hellið yfir rice crispiesblönduna og frystið í u.þ.b. 30 mín.
Skerið í bita og berið fram og njótið.
Uppskriftin birtist á Gulur, rauður, grænn og salt
Brieostur með fíkjum og pekanhnetum
1 stór Brie ostur eða þrír litlir
500 g fíkjur
300 g pekanhnetur, saxaðar gróft
1 dl vatn
2 msk Maple síróp
1/3 tsk salt.
Skerið fíkjur í tvennt og leggið í bleyti í um 30 mín. Hellið vatniu af og setjið í pott ásamt pekanhnetum, vatni, sírópi og salti og sjóðið í 10 mín. látið kólna.
Setjið ostinn á bakka, setjið fíkju- og hnetusamsullið yfir. Berið þunnskornar pylsur með og saltkex.
Döðluterta með hnetum og súkkulaði 
Hér má sjá hluta af glæsilegum veitingum í fermingarveislunni
Guðmundur á spjalli við Pál Bergþórsson aldursforsetann í veislunni
