Ossobuco
Kjartan Vídó er með skemmtilegri mönnum sem ég þekki. Hann er meðlimur í Matarklúbbnum Albert sem hélt afar eftirminnilegt matarboð fyrir skemmstu. Þar var boðið upp á Ossobuco sem bráðnaði í munni.
— KJARTAN VÍDÓ — OSSOBUCO —
.
Ossobuco
2 kg. ossobuco kálfakjöt
200 g hveiti
1/2 flaska hvítvín
4 sellerí stönglar
8 gulrætur
4 greinar rósmarín
2 greinar timían
3 lárviðarlauf
1 poki steinselja
2 laukur
1/2 l nautasoð
2 ds niðursoðnir tómatar
Nauðsynlegt er að hafa kjötið við stofuhita þegar byrjað er að elda það. Ég opnaði pakkningarnar og þerraði kjötið, skar svo í kantana til að skera í sundur sinar svo að kjötið myndi ekki verpast við steikingu. Því næst setti ég hveiti í skál og kryddaði með salti, pipar og þurrkuðu oreganó. Velti kjötinu upp úr hveitinu og steikti svo í 2-3 mínútur á hvorri hlið í pottinum sem ég eldaði svo allt í. Setti svo kjötið til hliðar og geymdi aðeins. Skar niður gulrætur, lauk og sellerí og steikti við miðlungshita í pottinum. Hellti síðan hálfri flösku af hvítvíni og leyfði því sjóða niður í nokkrar mínútur. Bætti við 0.5 lítrum af nautasoði í pottinn og tveimur dósum af niðurskornum tómötum ásamt smá tómatkrafti. Leyfði þessu að sjóða saman í nokkrar mínútur og kryddaði með ferskum kryddjurtum. Setti svo nánast allt innihaldið úr pottinum í skál og byrjaði að raða kjötinu í pottinn. Smá grænmetistómatblöndu neðst og svo kjöt og þannig koll af kolli eins mikið og potturinn leyfði. Því næst sett inn í ofn sem var stilltur á 130°C og eldaði þannig í 4 klukkutíma.
.
— KJARTAN VÍDÓ — OSSOBUCO —
.
