Kanilterta
Á Seyðisfirði býr Þóra Guðmundsdóttir arkitekt. Þóru hitti ég fyrst þegar ég var framkvæmdastjóri Þjóðahátíða á Austurlandi fyrir löngu síðan. Þá kom hún í Félagsheimilið Herðubreið, ásamt fjölmörgum Seyðisfirðingum, og aðstoðaði við að gera hátíðina sem besta.
— KANILTERTUR — SEYÐISFJÖRÐUR — TERTUR — KANILL — ÞÓRA GUÐMUNDSD — HÚSMÆÐRASKÓLAR —
.
Uppskriftina að Kaniltertunni fékk móðir Þóru á Húsmæðraskólanum á Laugarvatni um miðja síðustu öld. Tertan er og hefur alla tíð verið í miklu uppáhaldi hjá fjölskyldunni.
Faðir Þóru smíðaði skapalónið en einnig má fletja út deigið, leggja matardisk á hvolfi yfir og skera meðfram til að fá alla botnana jafn stóra.
Kanilterta
175 g smjör (við stofuhita)
175 g sykur
175 g hveiti
1 egg
1 tsk kanill
Setjið allt í hrærivélaskál og blandið vel saman. Smyrjið deigið þunnt út á vel smurða tertubotna. Bakið við 175°C í um 8 mín eða þangað þeir hafa tekið örlítinn lit. Kaniltertan á myndinni er úr tvöfadri uppskrift
Á milli: Þeyttur rjómi (í tvöfaldu uppskrift Þóru fór einn lítri), epli og bananar
Ofan á: Bræðið saman í vatnsbaði 100 g af góðu dökku súkkulaði og 1-2 msk af góðri olíu og hellið yfir
Kakan sett saman: Leggið botn á disk. Smyrjið á þunnu lagi af þeyttum rjóma, leggið ofan á niðurskorin epli (skorin í þunnar sneiðar), síðan aftur þunnt lag af rjóma. Setjið næsta botn ofan á, rjóma, banana í sneiðum og aftur þunnt lag af rjóma. Svona koll af kolli þangað til allir botnarnir eru komnir saman. Dreifið súkkulaðinu yfir og skreytið með berjum.
Einhverju sinni vorum við Bergþór á Seyðisfirði í byrjun september þegar hann söng á lokatónleikum Bláu kirkjunnar hjá Muff Worden. Þá fórum við í kaffi til Þóru sem var nýkomin úr berjamó. Við misstum okkur og hámuðum í okkur bláber og rjóma í eldhúsinu hjá henni.
Þórukjúklingur í leirpotti. Þóra bauð okkur líka í hádegismat. Í stóra leirpottinn sinn setti hún kartöflur og gulrætur í bitum, þar ofan á tvo heila kjúklinga. Síðan blandaði hún saman söxuðum hvítlauk, sítrónusafa, rósmarín, olíu, salti og pipar og hellti yfir kjúklingana. Síðan fór lokið á og þetta mallaði á lágum hita í ofninum í um tvo tíma. Með kjúklingnum var salat úr gróðurhúsi frúarinnar, marineraðir sveppir og nýbakað brauð.
.
— KANILTERTUR — SEYÐISFJÖRÐUR — TERTUR — KANILL — ÞÓRA GUÐMUNDSD — HÚSMÆÐRASKÓLAR —
.
