Smákökusmakk. Konráð og Rannveig buðu nokkrum vinum sínum að taka þátt í smákökusamkeppni heima hjá sér og fengu okkur Bergþór til að dæma. Mikill metnaður var hjá öllum, enda til mikils að vinna. Erla Dóra Vogler kom með tvær tegundir sem lentu í fyrsta og öðru sæti. DaimSörurnar bræddu okkur alveg niður. Hrafnhildur Árnadóttir varð í þriðja sæti með smjörkökur með pekanhnetum. Allar voru smákökurnar góðar og verðlaunavirði
SARA DAIMHARÐA
Botn:
100 g möndlur (í bitum eða flögum)
100 g pekanhnetur (brotnar niður)
200 g flórsykur
3 eggjahvítur
Stífþeyta eggjahvíturnar í drasl. Blanda möndlunum, pekanhnetunum og flórsykrinum varlega saman við eggjahvíturnar með sleikju. Setja u.þ.b. eina tsk á plötuna fyrir hverja köku og baka við 180°C í um 12 mín (þangað til þær eru aðeins byrjaðar að gyllast). Kæla á eftir.
Krem/ís:
4 dl rjómi
3 eggjarauður
100 g sykur
4 tsk daim súkkulaðiplötur eða aðeins muldar kúlur (minna plastrusl af því)
Stífþeyta rjómann og brjóta daimið (ekki of smátt því það er undarlega fullnægjandi að tyggja það). Þeyta eggjarauður og sykur vel saman (sykur á að bráðna alveg). Blanda rjómanum og súkkulaðinu varlega en vel saman við eggjakremið.
Samsetning:
Köldu botnarnir teknir og kremi skafið á neðri hlið þeirra og fryst. Þegar allt er orðið frosið þá er hægt að dýfa kremhlutanum í súkkulaði til að verja kremið frá því að klístrast út um allt, þar sem það bráðnar heldur hratt við stofuhita (enda ís). Hins vegar þá eru þær eiginlega betri að mínu mati án súkkulaðihjúpsins
Þetta er mín eigin útfærsla og mix, annars vegar á daimtertu – sem mamma gerði alltaf í “gamla daga” (og fékk alltaf sérstakan ljóma þar sem í botninum voru handtíndar pekanhnetur frá búgarði afa og ömmu í Bandaríkjunum), og sörunum sem ég hef aldrei náð að verða sérstaklega veik fyrir því ég fæ dálitla klýju af smjörkenndu kreminu.
JÓLÍFUBOLLUR. Í öðru sæti urðu Jólífubollur „Uppskriftina fékk ég fyrir nokkrum árum frá þeim mikla matgæðingi og snillingi Berglindi Einarsdóttur á Djúpavogi. Þær hafa verið árviss jólaviðburður síðan.” segir Erla Dóra
Jólífubollur
350 g rifinn ostur (t.d. parmesan og óðalsostur eða piparostur)
300 g hveiti
300 g smjör
1 tsk Worcestershire sósa (eða sojasósa og kannski aðeins meira en tsk)
Fylltar ólífur
Chili og hvítlauksduft á hnífsoddi (hann má alveg vera í stærra lagi og fínt að nota chiliflögur – má alveg smakka til deigið)
Blanda öllu nema ólífunum í skál og hnoða í deig. Móta litlar kúlur, gera gat með fingrinum, troða ólífu í og loka fyrir. Baka í u.þ.b. 10 mín (eða þangað til þær verða gylltar) við 200 °C.
Smjörkökur með pekanhnetum
250 g smjör, mjúkt
100 g púðursykur
50 g kókospálmasykur
300 g hveiti
2-3 msk rjómi
100 g appelsínusúkkulaði
100 g hvítt súkkulaði
50 g pekanhnetur, grófsaxaðar
50 g macadamia-hnetur, grófsaxaðar
Smjöri og sykri hrært vel saman og svo hveiti og rjóma bætt út í.
Grófsöxuðu súkkulaði og hnetum svo blandað saman og kúlur gerðar úr deginu. Svo er aðeins þrýst á kúlurnar til að fletja þær út áður en kökurnar eru bakaðar við 160 gráður í 25 mínútur.
Eftir að kökurnar hafa kólnað má svo skreyta þær með bráðnu súkkulaði og hnetum.
