Hið íslenska Royalistafélag hittist í vikunni á netfundum til að fagna stórafmælum drottninganna í Danmörku og í Bretlandi.
— ROYAL — ENGLAND — DANMÖRK — BORÐSIÐAFÆRSLUR — ELÍSABET DROTTNING — MARGRÉT ÞÓRHILDUR — PRINSESSUR —
👑
Margrét Þórhildur er einkar alþýðleg drottning, einstaklega listræn og hefur meðal annars myndskreytt bækur, gert leikmyndir og búninga fyrir leikhús, hannað og saumað hökkla og altarisklæði auk þess að halda myndlistarsýningar.
Hún fæddist 16. apríl 1940 og var fyrstu árin íslensk prinsessa, allt til ársins 1944. Drottningin sem hefur setið í 48 ár á valdastóli ber fjögur nöfn, Margrethe Alexandrine Þórhildur Ingrid. Þórhildarnafnið er íslenskt og er skrifað með hinu íslenska þ-i. Kristján X afi hennar var konungur yfir Íslandi þegar hún fæddist.
Meðal fjölskyldu hennar og annarra konungsfjölskyldna í Evrópu er hún kölluð Daisy sem merkir Margrét. Margrétarnafnið kemur einnig frá ömmu hennar sem var sænsk, af ensku bergi brotin en amma hennar var sjálf Viktoría drottning.
Þjóðarblóm Dana er Marguerite Daisy, Argyranthemum Frutescens, sem nefnist Runnabrá á íslensku en einnig stundum kallað Möggubrá.
Þegar Margrét fæddist árið 1940 hönnuðu silfursmiðir hjá Georg Jensen „Daisy“ skartgrip henni til heiður og hefur hún borið nælur og lokka með mynstrinu í ýmsum útfærslum við mörg tækifæri nú síðast í demantsútfærslu á áttræðisafmælinu.
Íslenskir Royalistar hafa þó nokkrar áhyggjur af reykingum drottningarinnar og bera þá einlægu ósk í brjósti að hún hætti eða dragi í það minnsta úr reykingum sínum, þegnum og aðdáendum sínum til þægðar.
👑
Þann 21. apríl fagnaði Elísabet Bretadrottning 94 ára afmæli sínu í Windsorkastala í skugga Kórónuveirunnar.
Drottningin sem fullu nafni heitir Elizabeth Alexanda Mary Windsor fæddist árið 1926 er ern og glæsileg kona sem viðheldur þrótti sínum með útreiðartúrum og gönguferðum með hundana sína. Hún klæðist ávallt litríkum fatnaði til að sem flestir eigi auðvelt með að koma auga á hana í mannfjölda.
Hún er þjóðhöfðingi 126 milljóna manna í 15 ríkjum breska samveldisins. Forsætisráðherrar hennar eru nú orðnir alls fjórtán talsins og þrettán Bandaríkjaforsetar hafa setið á stóli í hennar valdatíð.
Fjölskyldulífið hefur stundum valdið henni hugarangri eins og árið 1992 sem hún kallaði „annus horribilis“ í ræðu eftir margvísleg áföll og hneyklismál ársins. Það ár höfðu m.a. þrjú barna hennar skilið, og Windsorkastali staðið í ljósum logum.
Það er víst að aldrei er nein lognmolla í þeim efnum enda hafa fjölmiðlar haft úr nógu að moða undanfarið þegar kemur að málum Andrésar prins og hertogahjónanna af Sussex, Harry prins og leikkonunni Meghan Markle.
Hugur íslenskra royalista er hjá drottningunni á þessum erfiðu tímum fjölskyldunnar nú þegar sólin hnígur hægt í djúpan sæ.
Hið íslenska Royalistafélag sendir drottningunum báðum árnaðaróskir.
👑
.
— ROYAL — ENGLAND — DANMÖRK — BORÐSIÐAFÆRSLUR — ELÍSABET DROTTNING — MARGRÉT ÞÓRHILDUR — PRINSESSUR —
👑
