Kindakæfa Hjördísar
Ljúffeng, bragðmikil og heimagerð kindakæfa á nýbökuðu rúgbrauði – er eitthvað betra? Hér er uppskrift Hjördísar að einstaklega góðri kindakæfu úr lambaslögum, lauk og vel völdum kryddum.
Hver er sinnar kæfu smiður
Útvarpskonan Sigurlaug Margrét geðþekka sendi skilaboð úr húsmæðraorlofi sínu:
„Á morgun er kæfugerð systur minnar! Þetta er í alvöru fáránlega góð kæfa, fjölskyldan rífst um hana ef hún er að klárast. Ég er í raun að koma norður að gera þessa fokkings góðu kæfu.“
Það þarf varla sterkari meðmæli. Hér kemur uppskriftin að kindakæfu Hjördísar.
– KÆFA – LAMBAKJÖT – SIGURLAUG MARGRÉT – HJÖRDÍS RUT – HÚSMÆÐRAORLOF –
Kindakæfa Hjördísar
Kjötið og soðið
10 lambaslög
nokkrir súpukjötsbitar
3 heilir laukar
6 lárviðarlauf
2 msk. salt
1 msk. negulnaglar
2 msk. svört piparkorn
1 msk. blönduð piparkorn
Setjið þídd lambaslög og súpukjötsbita í stóran pott og látið suðuna koma upp. Fleytið froðu og óhreinindi ofan af.
Bætið lauk, lárviðarlaufum, salti, negulnöglum og piparkornum út í og sjóðið í um 2½ klukkustund, eða þar til kjötið er orðið mjög meyrt.
Takið slögin úr pottinum eitt í einu, fjarlægið bein og hreinsið mestu fituna frá.
Síið soðið og geymið um 4 lítra. Ekki þarf endilega að nota það allt. Veiðið mestu fituna ofan af soðinu.
Kæfan
Auk þess
7–8 laukar, afhýddir og skornir í báta
Krydd – u.þ.b. magn
3½ msk. salt
2½ msk. hvítur pipar
2 msk. grófmalaður svartur pipar
2 msk. piparblanda frá Prima
1½ tsk. engiferduft – ekki meira
8–10 msk. dökkt Toro Bouillon-kraftduft
Hakkið kjötið ásamt lauknum og setjið aftur í pottinn.
Hitið blönduna og hrærið vel saman. Bætið kryddinu og dálitlu af soðinu saman við í litlum skömmtum. Hrærið vel á milli og smakkið til jafnóðum.
Gætið þess að nota ekki of mikið soð. Kindakæfan á að vera mjúk og safarík en ekki of laus.
Kæfan má gjarnan vera örlítið bragðmeiri meðan hún er heit, því kryddbragðið dofnar aðeins þegar hún kólnar.
Setjið kæfuna í hæfilega stór ílát, kælið og frystið.
Berið kindakæfuna fram með góðu rúgbrauði – helst nýbökuðu.
Fleira áhugavert:
– Vegan – Þjóðsögur – Föstudagskaffið – Bananar – Kanill – Glútenlaust – Pasta – Rabarbari – Sikiley –