Veislukaffiboð með frændfólki
Þorbjörg frænka mín Jónasdóttir og Kristinn Sigurðsson, hennar maður, buðu heim í kaffi og ljómandi góðar veitingar. Aðrir gestir voru hjónin Birgir, bróðir Þorbjargar, og Þórdís ásamt bræðrunum Arnari og Ómari Kristinssonum. Mikið er ánægjulegt að sitja með góðu fólki við fallega dúkað borð og njóta þess að borða ljúffengar veitingar. Fyrir ættfróða þá voru ömmur okkar Arnars og Ómars systur, þær Vilborg og Þórunn Sigfúsdætur.
— AKUREYRI — KAFFIVEISLUR — EPLATERTUR — TÚNFISKSALÖT — GULRÓTATERTUR — SNITTUR — VILBORG SIGFÚSD —
.
Eplakaka Þorbjargar – Þetta er mjög sveigjanleg uppskrift
3-4 epli skorin (ekki mjög smátt) og sett í eldfast mót
Gott að strá smávegis kanelsykri yfir og ennþá betra að rífa dálítið marsípan (eða jafnvel súkkulaði svona spari) og blanda saman við eplin.
100 gr brætt smjör
100 gr dökkur púðursykur
50 gr hafragrjón
50 gr mulið Korn flakes, má vera frekar grófmulið.
(Ef hafragrjónin eru búin á heimilinu þá svínvirkar að nota eintómt Korn flakes).
Þessu er öllu blandað saman og smurt yfir eplin. Bakað við 180° í 30 mín.
Borið fram með ís eða þeyttum rjóma.
Reynslan segir að það geti komið sér vel að tvöfalda þessa uppskrift.
Rúllutertubrauð með túnfisksalati
Túnfisksalat:
c.a. 150 gr. mæjónes
c.a. 150 gr. sýrður rjómi
Kryddað eftir smekk t.d. Með Season all, sítrónupipar og Kryddi lífsins.
1 dós túnfiskur
1/2 rauð paprika söxuð smátt
partur af púrrulauk saxaður smátt
2-3 harðsoðin egg brytjuð
Öllum hráefnunum blandað saman og smurt á rúllutertubrauðið og því rúllað þétt saman. Örlitlu mæjónesi smurt yfir. Brauðið síðan skorið í sneiðar sem skreyttar eru með eggi, gúrku, vínberjum og steinselju.
Rónaréttur Þórdísar
150-200 gr makkarónukökur
c.a. 1 dl sherry
c.a. 100 gr súkkulaði (að eigin vali)
Ýmsir ávextir t.d. 1-2 epli, mangó, banani, kíwi, græn og rauð vínber, bláber og jarðarber.
Makkarónurnar muldar og settar í botninn á formi eða skál. (Best að nota ílát með víðum botni). Síðan er bleytt í með sherrýinu. Súkkulaðið brytjað og sett ofan á. Ávextirnir skornir í bita og dreift yfir. Fallegt að hafa berin efst. Best er að láta réttinn bíða í 1/2–1 sólarhring. Borinn fram með þeyttum rjóma.
Gulrótarkaka – Þorbjargar
3 dl hveiti
1 tsk lyftiduft
1 tsk natron
1/2 salt
2 tsk kanill
1 tsk múskat
2 dl sykur
1 dl matarolía
3 egg
1 bolli rifnar gulrætur
Öllu blandað saman í skál og hrært vel saman
Bakað við 180°C í c.a. 30 mín.
Krem:
150 gr rjómaostur
50 gr mjúkt smjör
1/2 tsk vanilla
1 bolli flórsykur
1 msk sítrónusafi
Smjör, rjómaostur og vanilla og sítrónusafi þeytt þar til vel mjúkt. Flórsykrinum blandað í smátt og smátt þangað til kremið er orðið hæfilega þykkt. Í október setur maður dropa af rauðum matarlit, svo kremið verði fallega bleikt.
— AKUREYRI — KAFFIVEISLUR — EPLATERTUR — TÚNFISKSALÖT — GULRÓTATERTUR — SNITTUR — VILBORG SIGFÚSD —
.
