Baby Ruth tertan
Baby Ruth terta er ein af þessum kökum sem hverfur af tertudisknum á örskotsstundu. Hún sameinar stökkan marengsbotn með salthnetum og saltkexi, silkimjúkt súkkulaðikrem og léttþeyttan rjóma.
Þrátt fyrir nafnið þarf ekkert Baby Ruth súkkulaðistykki í uppskriftina – bragðið minnir einfaldlega á hinn fræga ameríska sælgætisbita með súkkulaði, karamellu og hnetum. Þetta er fullkomin veisluterta sem má jafnvel gera daginn áður.
Baby Ruth kom fyrst á markað í Bandaríkjunum árið 1921. Það var framleitt af fyrirtækinu Curtiss Candy Company. Nafnið “Baby Ruth” hefur oft valdið misskilningi. Sumir halda að það sé nefnt eftir hinum fræga hafnaboltaleikmanni Babe Ruth, en framleiðandinn hélt því fram að það væri í raun nefnt eftir Ruth Cleveland, dóttur Grover Cleveland Bandaríkjaforseta, sem lést ung að aldri. Þó hefur verið deilt um hvort þetta hafi verið satt eða hvort þetta hafi verið leið fyrirtækisins til að nýta sér vinsældir Babe Ruth án þess að þurfa að greiða honum leyfisgjöld.
— GUÐRÚN BJARNADÓTTIR – SALTHNETUR – HESPUHÚSIÐ – SELFOSS – FERÐAST UM ÍSLAND – EGILSSTAÐIR – AKUREYRI – BABY RUTH – RITZ KEX –
.
BABY RUTH
3 eggjahvítur
2 dl sykur
1 tsk vanilludropar
2 tsk lyftiduft
2 1/2 dl salthnetur
25 Ritzkex
Þeytið eggjahvítur og sykur. Myljið saman salthentur og kex með því að setja í plastpoka og berja með glasi inni í pokann… Blandið öllu varlega saman.
Setjið í smurt hringlaga bökunarform. Bakið í 20 mínútur á 175°C
Kremið
3 eggjarauður
60 g flórsykur (1 dl)
50 g smjör
100 g suðusúkkulaði
Þeytið eggjarauður og flórsykur, bræðið smjörið og súkkulaðið í vatnsbaði (eða örbylgjuofni) og hrærið saman. Best er að láta súkkulaðikremið kólna örlítið áður en það er smurt á botninn.
Kakan þarf helst að standa í kæli í nokkra tíma áður en hún er borin fram. Kakan geymist í ísskáp í allt að 3 daga og verður jafnvel betri.
Berist fram með rjóma
Algengar spurningar
Má gera Baby Ruth tertuna daginn áður?
Já, hún verður jafnvel betri eftir nótt í kæli.
Má nota aðrar hnetur?
Já, en saltaðar jarðhnetur gefa klassíska Baby Ruth bragðið.
Má sleppa saltkexinu?
Já, en það gefur botninum skemmtilega stökka áferð.
.
Fleira spennandi:
— Súkkulaðitertur — Chia — Morgunmatur — Ostakökur — Kartöflur — Salöt — Kryddbrauð — Skyrtertur – Egilsstaðir –