Kókos-karrí-rjóma-fiskisúpa

Kókos-karrí-rjóma-fiskisúpa. Soffía Auður Birgisdóttir bókmenntafræðingur bauð í dýrindis humarsúpu á Höfn í Hornafirði.

Soffía er vel kunn fyrir störf sín, m.a. á sviði kvennabókmennta og ekki síst fyrir doktorsritgerð sína og bók um verk Þórbergs Þórðarsonar.
Hún er talin líkjast leikkonunni Meryl Streep, jafnvel svo að þess eru dæmi að fólk hafi litið snöggt á hana á sjónvarpsskjá og orðið forviða á því að Meryl skuli vera farin að tala reiprennandi íslensku. Soffía er aftur á móti ekki kunn fyrir að hafa leikið mikið, en hún hefur þó á fjölbreyttum ferli sínum skrifað leiklistargagnrýni jafnhliða gagnrýni um bókmenntir.
Eiginmaður Soffíu er Þorvarður Árnason náttúrufræðingur og forstöðumaður Háskólaseturs Hornafjarðar, en þess má geta að hann er frábær ljósmyndari en hógvær. Þó má nú loks vænta sýningar af hans hálfu.

Þau hjón kunna þá list að taka á móti fólki opnum örmum, frjálsleg, skemmtileg og hreinskiptin.

Það veiðist lítið af humri, en búandi á Hornafirði hefur humarsúpa verið ótal sinnum á matseðlinum í gegnum árin. Soffía segist upphaflega hafa fundið uppskriftina í Veislubók Hagkaupa, en eins og gengur hefur hún þróast og tekið ýmsa snúninga.

— HORNAFJÖRÐUR — FISKISÚPUR — HUMAR — FISKRÉTTIR — KRÆKIBERJASAFT – HUMARSÚPUR –

.

Kókos-karrí-rjóma-fiskisúpa

Súpan er gerð með góðum grænmetisgrunni, þ.e. ég byrja á að steikja gulrætur, sellerí, blaðlauk og hvítlauk í olíu og blanda karrí og tómatpúrru saman við. Helli síðan 1-2 lítrum af vatni saman, smá hvítvít (eða mysu) líka, fiskiteninga (2 í 1 lítra) og súputeninga (4 í 1 lítra) og sýð þetta í korter. Þá sía ég grænmetið úr og baka upp súpuna með smjörbollu (smjör og hveiti). Þá er komið að því að bæta kókosmjólk út í (1 dós í 1 lítra) og að lokum fullt af rjóma.

— HORNAFJÖRÐUR — FISKISÚPUR — HUMAR — FISKRÉTTIR — KRÆKIBERJASAFT – HUMARSÚPUR –

.