Finnskur sumardraumur
Margir vinir mínir kannast við „finnsku konuna”, Valborg vinkona mín hafði sérstakan áhuga á finnsku í barnæsku og lá límd við sjónvarpið til að ná hljómfallinu og svo æfði hún sig öllum stundum í bull-finnsku. Stundum sendir hún okkur óborganlega skemmtileg myndbönd sem „finnska konan”. Hún á það til að senda okkur svipuð myndbönd á spænsku og þýsku.
Valborg er nágranni okkar og bauð í kvöldkaffi, fengum magnaða möndlutertu með vanillukremi sem er í miklu uppáhaldi hjá fjölskyldunni (og núna okkur líka).
— FINNLAND — VALBORG GUÐRÚN — MÖNDLUTERTUR — SPÁNN — ÞÝSKALAND —
.
Finnskur sumardraumur
Botn:
4 eggjahvítur
150 grömm flórsykur
Þeytt vel saman.
150 gr. hakkaðar möndlur
½ teskeið lyftiduft
Blandið varlega við eggjahvítur og flórsykur.
Bakið við 175°C í u.þ.b. 30 mínútur.
Krem:
6 eggjarauður
150 grömm sykur
2 dl rjómi
1 ½ teskeið vanillusykur
150 grömm smjör, við stofuhita – geyma þar til síðar.
Setjið rauður, sykur, rjóma og vanillusykur í pott og hitið við lágan hita – það er mikilvægt að hræra nánast stanslaust á meðan kremið þykknar. Þegar ásættanlegri áferð er náð, er kremið látið standa í pottinum og látið ná stofuhita.
Hrærið þá vel í kreminu, bætið smjörinu út í og hrærið þar til að komin er silkiáferð.
Smyrjið kreminu á botninn, kælið og skreytið með berjum og súkkulaði.
Þessi kaka er best vel kæld og gott að geyma í frysti ef hún klárast ekki öll í einu.
— FINNLAND — VALBORG GUÐRÚN — MÖNDLUTERTUR — SPÁNN — ÞÝSKALAND —
.
