Margir vinir mínir kannast við „finnsku konuna“ – skemmtilegan karakter sem Valborg vinkona mín hefur skapað. Hún hafði nefnilega óvenjulegan áhuga á finnsku í æsku, sat límd við sjónvarpið til að ná hljómfallinu og æfði sig síðan óspart í sinni eigin, óviðjafnanlegu „bull-finnsku“. Enn í dag sendir hún okkur óborganlega fyndin myndbönd í þessu hlutverki – og stundum bregður hún jafnvel fyrir sig spænsku eða þýsku með sama tilþrifum.
Valborg er nágranni okkar og bauð okkur nýlega í kvöldkaffi. Þar kom hún á óvart með dásamlegri möndlutertu með silkimjúku vanillukremi – köku sem hefur lengi verið í uppáhaldi hjá fjölskyldunni hennar. Eftir þetta kvöld er hún sannarlega líka komin í okkar uppáhald.
— FINNLAND — VALBORG GUÐRÚN — MÖNDLUTERTUR — SPÁNN — ÞÝSKALAND —
.
Finnskur sumardraumur
Botn:
4 eggjahvítur
150 grömm flórsykur
Þeytt vel saman.
150 gr. hakkaðar möndlur
½ teskeið lyftiduft
Blandið varlega við eggjahvítur og flórsykur.
Bakið við 175°C í u.þ.b. 30 mínútur.
Krem:
6 eggjarauður
150 grömm sykur
2 dl rjómi
1 ½ teskeið vanillusykur
150 grömm smjör, við stofuhita – geyma þar til síðar.
Setjið rauður, sykur, rjóma og vanillusykur í pott og hitið við lágan hita – það er mikilvægt að hræra nánast stanslaust á meðan kremið þykknar. Þegar ásættanlegri áferð er náð, er kremið látið standa í pottinum og látið ná stofuhita.
Hrærið þá vel í kreminu, bætið smjörinu út í og hrærið þar til að komin er silkiáferð.
Smyrjið kreminu á botninn, kælið og skreytið með berjum og súkkulaði.
Þessi kaka er best vel kæld og gott að geyma í frysti ef hún klárast ekki öll í einu.
Það er eitthvað við svona kökur og góðan félagsskap sem gerir lífið aðeins sætara – takk Valborg 💛
— FINNLAND — VALBORG GUÐRÚN — MÖNDLUTERTUR — SPÁNN — ÞÝSKALAND —
.