Pignoli – hátíðlegar ítalskar smákökur
Um daginn rakst ég á uppskrift af ítölskum smákökum sem ég hafði ekki séð áður – Pignoli. Þær eru úr marsípani og hjúpaðar furuhnetum og eru bæði einfaldar og afar glæsilegar. Nafnið er dregið af ítalska orðinu pigna, sem merkir furuhnetuklasi, og vísar beint til furuhneta sem eru eitt helsta einkenni kökunnar.
Pignoli eru ljúffengar: mjúkar og safaríkar að innan en með fallega ristaðar, stökkar furuhnetur að utan. Þær eru fullkomnar með góðu kaffi eða glasi af eftirréttavíni og eiga sérstaklega vel við yfir hátíðir og við hátíðleg tilefni. Njótið!
Smákökurnar eiga sér langa og áhugaverða sögu, einkum á Sikiley og á Suður-Ítalíu. Uppruna þeirra er oft rakið til Araba, sem höfðu djúpstæð áhrif á matargerð svæðisins á miðöldum.
.
— SMÁKÖKUR — JÓLIN — ÍTALÍA — FURUHNETUR — MARSIPAN — SIKILEY — ENGLISH —
.
Pignoli – hátíðlegar ítalskar smákökur
- 200 g marsípan
1 dl sykur
2 eggjahvítur
1 tsk vanilludropar
150 g furuhnetur
Flórsykur til að strá yfir.Setjið marsípan (í sneiðum), sykur, eggjahvítur og vanilludropa í matvinnsluvél. Blandið þar til deigið er slétt og vel samlagað.
Mótið litlar kúlur úr deiginu, um 3 cm í þvermál. Veltið hverri kúlu upp úr furuhnetum þannig að þær þeki yfirborðið vel.
Raðið kúlunum á bökunarpappírsklædda ofnplötu með smá millibili. Bakið við 175°C í 15–20 mínútur, eða þar til kökurnar eru fallega gullbrúnar að ofan, stökkar að utan en mjúkar að innan.
Látið kökurnar kólna og stráið flórsykri yfir rétt áður en þær eru bornar fram.
— SMÁKÖKUR — JÓLIN — ÍTALÍA — FURUHNETUR — MARSIPAN — SIKILEY —ENGLISH —
.
[…] Pignoli – ítalskar smákökur […]
Comments are closed.