Ítalíuskotið matarboð hjá Soffíu Sæm
Soffía Sæmundsdóttir myndlistarmaður hefur vakið athygli um langt skeið fyrir landslagsmyndir sínar þar sem gjarnan bregður fyrir íbyggnum og krúttlegum ferðalöngum sem klæddir eru í föt sem minna á íslenska þjóðbúninginn. Síðast var hún með töfrandi sýningu í Safnahúsinu á Ísafirði, þar sem ferðalangarnir voru reyndar ekki í aðalhlutverki, en litavalið og dýptin draga mann alltaf að málverkunum hennar.
En Soffía sýnir líka listir í eldhúsinu, eins og fjölskylda og vinir hennar vita. „Við Signý systir borðuðum einhverju sinni saman á La Primavera og fengum eitt það besta sjávarréttapasta sem ég hef bragðað. Þessi pastaréttur er byggður á þeim góða rétti og hefur verið í þróun hjá mér. Eftirrétturinn er frá mömmu. Þennan eftirrétt útbjó hún aðeins einu sinni á ári, á jólunum, og við systur fyllumst nostalgiu þegar við fáum þennan rétt, bökuð epli með marengs.“
— ÍTALÍA — PASTA — EPLI — MARENGS —
.
Pestó úr sólþurrkuðum tómötum og döðlum
Ein lítil krukka sólþurrkaðir tómatar
2 kúfaðar matskeiðar smurostur
10 döðlur
1 dl grænar ólífur í hvítlaukslegi
1 dl. ólífuolía (má vera minna)
1 hvítlauksrif
1 lúka furuhnetur
skvetta sítrónusafi
Maukað saman með töfrasprota og vökva bætt í eftir þörfum
Sett í skál, skreytt með steinselju, borið fram með snittubrauði eða saltkexi
Sítrónu og kapers-túnfiskpestó
2 dósir túnfiskur(vatn sigtað vel frá)
100 g mjúkt smjör
1 dl rjómi
1 sítróna (börkur raspaður og safi kreistur, settur út í)
1 kúfuð msk kapers
2 msk steinselja
Lúka af pistasíuhnetum
Skvetta af góðri ólífuolía ef of þykkt
Allt maukað saman með töfrasprota, vökva bætt í eftir þörfum(rjóma/ólífuolíu). Skreytt með sneið af sítrónuberki, steinselju og pistasíuhnetum. Borið fram með snittubrauði og/eða saltkexi. Rískökur með sýrðum rjóma frá Himneskri hollustu passa vel með þessu.
Ítalskt sjávarréttapasta (fyrir 4)
Lykillinn að þessum rétti er að setja hann saman á djúpa diska og bera fram fyrir hvern og einn. Ferskt pasta, ferskur fiskur, góð ólífuolía og nýrifinn parmesan ostur gera matinn að veislu.
Fyrst er að gera sósuna:
1 lítri Gríms humarsúpa sett í pott og hituð
2 hvítlauksrif smátt skorin
2 rautt chili skorið smátt
2 dl. rjómi og smjörklípa
Hvítlaukur og chili steikt á snarpheitri pönnu upp úr smá ólífuolíu. Sett út í súpuna ásamt rjómanum og smjöri. Þá er sósan tilbúin.
Aspasinn:
1 pakki grænn ferskur aspas steiktur upp úr smjöri og ólífuolíu í uþb. 5 mínútur þar til hann er orðinn mjúkur undir tönn. Örlitlu maldon salti stráð yfir. Sett til hliðar.
Fiskurinn:
2 vænir þorskhnakkar(600 grömm eða svo) skornir í 8 bita og settir í eldfast mót.
Ólífuolíu sett yfir ásamt kryddinu. Ég notaði Fagur fiskur frá Kryddhúsinu, örlítið salt og pipar. Látið bíða smástund.
Box af íslenskum smáum kokteltómötum sem er stungið á milli fiskbitanna og fiskurinn settur í 175°C heitan ofn í 20 mínútur. Passa að taka hann strax út þegar tilbúinn.
Pastað:
400 g ferskt Fettuccine (3 pakkar)
2 lítrar vatn soðið með smá salti.
Pastað sett út í sjóðandi vatnið og soðið skv. leiðbeiningum á pakka (uþb. 2 mínútur). Soðið síðast, vatnið sigtað frá og töng notuð til að setja pastað á diskinn.
Samsetning á diskinn:
Vænn slatti af pasta
2 ausur af sósu
2 bitar af fiski
3 -4 tómatar eftir smekk
3-4 aspasstangir
Parmesan osti stráð yfir
Steinselja
Jólaeftirrétturinn hennar mömmu
6 gul epli skorin í báta, skræld og skorin í bita, passar að fá 2 bita úr hverjum bát.
Sett í pott með smá vatni(1 dl) og sykri eftir smekk(1-2 dl.) Soðið í 2-3 mínútur. Maður á að finna aðeins fyrir þeim, ekki sjóða of lengi. Sett í eldfast mót með safanum.
4 eggjahvítur
2 bollar sykur
Eggjahvítur stífþeyttar, sykri bætt smám saman út í og þeytt dágóða stund. Sett yfir eplin í mótinu og inn í 160°C heitan ofn í u.þ.b. 30 mínútur.
Borið fram með vel þeyttum ísköldum rjóma.
— ÍTALÍA — PASTA — EPLI — MARENGS —
.
