Smákökur Ólafs
Eftir jólin skruppum við með sonarsoninn, hann Ólaf, til Kaupmannahafnar og spígsporuðum um Strikið, Amalienborg, Tivoli, fengum okkur jólaplatta í Nýhöfn, heitt súkkulaði á Hotel d‘Angleterre, en það sem kom okkur mest á óvart var að Ólafur var áhugasamur um Thorvaldsens safnið og skoðaði vel málverkin í Glyptoteket, einkum van Gogh. Við vanmetum stundum krakka, höldum að þau vilji bara Legoland og pizzur.
En af því að við vorum að frílista okkur, ákváðum við að Óli mætti velja sér súkkulaðistykki á hverjum degi og það var reyndar ekki erfitt val, hann fékk sér alltaf Mars.
Þegar heim kom, gerðum við svo Mars smákökur. Þær eru dæmigerðar jólasmákökur, stökkar og sætar. Það má samt ekki borða þær á hverjum degi.
— ÓLAFUR — SMÁKÖKUR — KAUPMANNAHÖFN —
.
Smákökur Ólafs
150 g mjúkt smjör
1 b púðursykur
½ b sykur
2 egg
Rúmir 2 b hveiti
1 tsk matarsódi
½ tsk salt
2 tsk vanillusykur
150 g suðusúkkulaði
4 lítil Mars stykki
Þeytið smjör og sykur saman, bætið eggjum út í, þá þurrefnum. Síðast er súkkulaði og Mars bætt út í.
Bakið við 160°C í 10-15 mín., en fylgist með, því að ofninn minn er heitur.
