Blind restaurant í Portó

Við systkinin fórum með mömmu til Portó í Portúgal – borg sem er alveg ótrúleg í alla staði. Einn af þeim veitingastöðum sem stendur sérstaklega upp úr í minningunni heitir Blind – ógleymanleg upplifun.

Á Blind geturðu valið á milli tíu eða tólf rétta matseðils, en það skemmtilega (og pínu spennandi) er að þú veist ekkert fyrirfram hvað þú færð að borða. Hér snýst allt um að treysta skynfærunum – smakka, finna ilminn, hlusta – og leyfa sér að vera hissa og heillast.

Blind er innblásinn af skáldsögunni Ensaio sobre a cegueira, Blindness, eftir portúgalska Nóbelskáldið José Saramago, þar sem sjónin hverfur – og skynjunin dýpkar. Þessi hugmynd er fallega fléttuð inn í matreiðsluna sjálfa: réttirnir eru framreiddir með hugvitsemi, smá leyndardómi og oft með óvæntum kveikjum sem veita gleði og forvitni.

Það er ljóst að á Blind vinnur fólk með ótrúlegt ímyndunarafl og alvöru ástríðu fyrir því að skapa minningar – ekki bara máltíð. Til að skemma ekki fyrir ykkur ætlum við ekki að segja meira. En eitt er víst: ef þið viljið láta koma ykkur hressilega á óvart, þá verðið þið að heimsækja Blind næst þegar leiðin liggur til Portó.

— PORTÓ — PORTÚGAL — VEITINGASTAÐIR — MATARBORGIR — MAMMA — VILBORG — ÁRDÍS HULDA —

🇵🇹