Rabarbarasulta með chili og engifer
Guðný frá Kolfreyjustað sendi mér á dögunum dásamlega rabarbarasultu í tveimur útgáfum, annars vegar með chili og hins vegar með engifer. Guðný er af miklu matarfólki komin og í þeirri fjölskyldu er ekki kastað til hendinni þegar kemur að góðum mat. Ég vandi snemma komur mínar í eldhúsið á Kolfreyjustað og sat þar oft yfir nýbökuðu kaffimeðlæti og öðru góðgæti. Það voru sannarlega dásamlegir tímar.
— GUÐNÝ ÞORLEIFS – KOLFREYJUSTAÐUR – RABARBARI – SULTA – ÍSLENSKT –
.
Rabarbarasulta með engifer
500 g rabarbari
250 g hrásykur
um 5 cm ferskt engifer, rifið
Brytjið rabarbarann og setjið í pott með sykrinum. Látið standa þar til sykurinn hefur bráðnað saman við safann sem kemur úr rabarbaranum. Bætið rifnu engiferinu út í og sjóðið við vægan hita þar til sultan hefur fengið fallegan lit og góða áferð. Maukið með töfrasprota ef óskað er eftir sléttari sultu.
Rabarbarasulta með chili
500 g rabarbari
250 g hrásykur
1 chili, fræhreinsað og smátt saxað
Brytjið rabarbarann og setjið í pott með sykrinum. Látið standa þar til sykurinn hefur bráðnað saman við safann sem kemur úr rabarbaranum. Bætið chili út í og sjóðið við vægan hita þar til sultan er orðin hæfilega þykk og hefur fengið fallegan lit. Maukið með töfrasprota ef þið viljið sléttari áferð.
„Gerði líka svona með bláberjum, klikkaði alveg á að senda þér hana en það er snilld líka.“
Kveðja,
Guðný á Kolfreyjustað
.
— Brauðréttir – Salöt – Fiskur í ofni – Fjallagrös — Drykkir — Ítalía — Pasta — Epli —