Bessastaðakökur
Áferðin á verðlaunasmákökum Kormáks minnti dómefndina á Bessastaðakökur. Vigdís Finnbogadóttir, sem var með okkur í dómnefndinni, er einstaklega fróð um alla heima og geima eins og alþjóð veit og auðvitað var ekki komið að tómum kofunum þegar talið barst að smákökum og öðrum bakstri. Þegar heim var komið fletti Vigdís upp í máðri handskrifaðri uppskriftabók sinni og deildi með okkur eftirfarandi um Bessastaðakökur:
„Föðursystur mínar, aldar upp á prestssetrinu í Sauðlauksdal upp úr fyrri aldamótum, -(en þar bauð prestsmaddaman hún amma mín sóknardætrum oft að koma að læra hannyrðir og matargerð), bökuðu alltaf þessar kökur fyrir jólin og gáfu okkur í fjölskyldunni í fallegum kössum fyrir hátíð. Þær sendu meira að segja box til æskuvinkonu minnar í Ameríku, þegar hún dvaldi þar um jól. En Bessastaðakökur voru þær kallaðar af því að þær voru sagðar ættaðar frá Jakobínu Thomsen, konu Gríms Thomsens þegar hann bjó á Bessastöðum á síðari hluta 19. aldar. Svo það er skáldakeimur af þessum mögnuðu smákökum.
🇮🇸
— BESSASTAÐIR — VIGDÍS FINNBOGADÓTTIR — SMÁKÖKUR — SAUÐLAUKSDALUR — SKÍRT SMJÖR — FORSETI — JÓLAUPPSKRIFTIR —
🇮🇸
„Ég tók með mér þessa uppskrift þegar ég flutti til Bessastaða og þær voru alla mína tíð bakaðar þar – reyndar allan ársins hring – og bornar fram í silfurskál (eins og konfekt) með kaffi (og aðeins þær sem bakkelsi) öllum þeim sem komu í stutt viðtöl eða með einhver erindi, – það var alltaf öllum boðið kaffi að gömlum sveitasið.“ segir Vigdís forseti.
Bessastaðakökur
250 g hveiti
250 g smjör
125 g sykur
125 g flórsykur
grófur sykur
gróft malaðar möndlur (hnetur)
Smjörið brætt, látið storkna aftur og öll syrja skafin neðan af (skírt smjör). Blandið hveiti og sykri saman, myljið smjöri saman við. Hnoðið vel. Fletjið út en ekki mjög þunnt. Mótið frekar litlar kringlóttar kökur. Penslið eggi á miðjuna og stráið á grófum sykri og möndlum. Bakið við 180° í 9-10 mín.(fer eftir ofnum)
Þó ég sé talsmaður þess að minnka sykur í tertum og kökum gerði ég það ekki núna í þessari uppskrift en bætti við 1/2 tsk af salti. Eggið, möndlurnar/hneturnar og sykurinn eiga að vera í lítilli fallegri hrúgu á miðjunni.
🇮🇸
— BESSASTAÐIR — VIGDÍS FINNBOGADÓTTIR — SMÁKÖKUR — SAUÐLAUKSDALUR — SKÍRT SMJÖR — FORSETI — JÓLAUPPSKRIFTIR —
🇮🇸
