Jarðarberjaterta
Hef áður nefnt hér eftirminnilegar tertuhefðir í barnæsku minni… æ, hvaða hvaða, ég fer að verða eins og Nigella, hún er alltaf að tala um matinn þegar hún var að alast upp…. Nema hvað á sumardaginn fyrsta bakaði mamma alltaf Sólskinstertu, ægigóða köku með vænum slurk af möndludropum (svo húsið angaði í þrjá daga á eftir), kakan var borin fram með karamellusósu. Á nýársdag, eins langt og elstu menn muna, hefur verið jarðarberjaterta á boðstólnum á Brimnesi – dásamlega góð 🙂 Það er svo ágætt að hafa í huga að botnana má baka tímanlega og frysta, þeir breytast ekkert við það. Svo er kjörið að vakna snemma á nýársdag (NOT) og setja jarðarberjarjómann á milli botnanna á meðan 9. sinfónía Beethovens hljómar í útvarpinu.
🍓
— MARENGSAR — JARÐARBER — SÓLSKINSTERTA — BRIMNES — FÁSKRÚÐSFJÖRÐUR — JARÐARBERJATERTUR — HEFÐIR —
🍓
Jarðarberjaterta
Botnar:
4 eggjahvítur
1 b sykur
2 b kókosmjöl
1/2 tsk salt
100 brytjað suðusúkkulaði (dökkt gott súkkulaði)
Á milli:
1/4 l rjómi
1 heildós jarðarber
fersk jarðarber til skrauts
Þeytið eggjahvítur og sykur MJÖG vel. Bætið kókosmjöli, súkkulaði og salti saman við með sleikju. Leggið kringlótt form á bökunarpappír og teiknið tvo hringi. Setjið deigið í hringina tvo og bakið við 130° í uþb 30 mín (eða lengur). Kælið. Stífþeytið rjómann. Hellið safanum af jarðarberjunum og bætið saman við rjómann. Setjið á milli botnanna og látið standa í 7-10 klst. í ísskáp.
🍓
— MARENGSAR — JARÐARBER — SÓLSKINSTERTA — BRIMNES — FÁSKRÚÐSFJÖRÐUR — JARÐARBERJATERTUR — HEFÐIR —
🍓
