Draumur forsetans – Vigdísar forseta

Draumur forsetans – Vigdísar forseta

 rabarbarakaka með marengs

Fljótlega upp úr aldamótum kom út í Noregi bókin Kjendisenes beste kaker eftir Guðrúnu Rúnarsdóttur. Þar má meðal annars finna þessa dásamlegu köku – Draum forsetans, sem tengist Vigdís Finnbogadóttir.

Þetta er einstaklega ljúf rabarbarakaka með stökkum marengs ofan á, best borin fram volg með þeyttum rjóma eða góðum ís. Hún hefur lengi verið í miklu uppáhaldi hjá mér – bæði vegna bragðsins og sögunnar sem fylgir henni.

Á sínum tíma, þegar ég skrifaði í Gestgjafann, nefndi ég við Vigdísi oftar en einu sinni hvort hún væri til í að baka þessa tertu fyrir blaðið. Hún brosti og svaraði alltaf á sinn einstaka hátt:
„Elsku besti Albert, ég er löngu hætt að baka.“

Vigdís hefur þó komið áður við sögu hér á blogginu, meðal annars þegar hún dæmdi með okkur í smákökusamkeppni á aðventunni og sagði frá Bessastaðakökum.

🇮🇸

— BESSASTAÐIR — VIGDÍS FINNBOGADÓTTIR — MARENGS — TERTUR — EFTIRRÉTTIR — 17. JÚNÍ —

🇮🇸

Draumur forsetans

Botn:
250 g hveiti
200 g smjör
1/2 tsk lyftiduft
1 eggjarauða
1 msk vatn
1/3 tsk salt

Fylling:
3 eggjarauður
1 dl sykur
4 dl fínt skorinn rabarbari (skiptið stilkunum langsum fyrst til að bitarnir verði eins litlir og hægt er)
1 msk hveiti

Marengs:
1 1/2 msk sykur
4 eggjahvítur
1 tsk vanilla / vanillusykur.

Blandið saman hveiti, lyftidufti, smjöri og bætið við eggjarauðu, vatni og salti. Hnoðið vel saman og mótið kúlu. Hyljið með plastfilmu og látið deigið í ísskáp í 30-60 mín. Fletjið deigið út og setjið í kringlótt smurt kökuform. Látið deigið koma upp fyrir kantana á forminu því það dregst saman við baksturinn. Bakið við 150°C í u.þ.b. 10 mín.  eða þar til bakan verður ljósbrún.

Á meðan bakan er í ofninum er rabarbarafyllingin undirbúin. Hrærið eggjarauðurnar saman við sykurinn. Blandið rabarbara og hveiti lauslega saman og hrærið saman við eggin og sykurinn rétt áður en botninn er bakaður, það það er mikilvægt að sykurinn bráðni ekki alveg. Dreifið fyllingunni yfir bökubotninn og bakið við 150° í u.þ.b. 20 mín. eða þar til rabarbarinn er orðinn mjúkur.

Þá er marengsinn búinn til. Stífþeytið eggjahvítur, sykur og vanillusykur í marengs, sem svo er smurt eða sprautað ofan á rabarbarafyllinguna. Bakið við 125-150°C í u.þ.b. 20 mín.

Þegar ég bakaði kökuna í annað skipti bætti ég smátt skornum marsípani út í rabarbarafyllinguna og minnkaði sykurinn aðeins. Það gerði kökuna enn betri – meira dýpt í bragðinu og mildari sæta.

(Uppskriftin er hér lítillega breytt)

Fleira áhugavert:

—  Vínarterta með glassúr –  Kókosterta — Brún lagkaka  — Rúgmjölspartar  — Ásta Snædís býður í kaffi — Hægeldaðir lambaskankar  — Steiktur fiskur í brúnni sósu og ávaxtagrautur með rjóma  —  Saltfiskur í ólífuolíu  — Póstlistinn — Kíví – hollur ávöxtur sem má borða með hýðinu —