Kartöflusalat með kapers
Þetta ferska og bragðmikla kartöflusalat með kapers er einfalt í útbúningi og hentar vel með fjölbreyttum mat. Sítrónusafi, rauðlaukur og sellerí gefa salatinu ferskleika en kapersið bætir við skemmtilega söltu og örlítið súru bragði.
Ef ég man rétt á uppskriftin rætur að rekja til Jamie Oliver. Ég er sérstaklega hrifinn af kapers og set því gjarnan aðeins meira en gefið er upp – jafnvel teskeið af kapersleginum líka.
Best er að blanda salatinu saman á meðan kartöflurnar eru enn volgar. Þá draga þær betur í sig ólífuolíuna, sítrónusafann og allt góða bragðið.
.
– KARTÖFLUR – SALÖT – KAPERS – KARTÖFLUSALÖT – JAMIE OLIVER –
.
Kartöflusalat með kapers
500 g litlar kartöflur
5–6 msk. ólífuolía
½ rauðlaukur, smátt skorinn
1 dl sellerí, saxað
2 msk. kapers, eða meira eftir smekk
safi úr ½–1 sítrónu
1 tsk. kaperslögur
salt og nýmalaður svartur pipar
Sjóðið kartöflurnar með hýðinu í léttsöltu vatni þar til þær eru meyrar.
Hellið vatninu af og leyfið kartöflunum að kólna aðeins.
Skerið kartöflurnar í tvennt á meðan þær eru enn volgar.
Setjið þær í skál ásamt rauðlauk, selleríi og kapers.
Hellið ólífuolíu og sítrónusafa yfir. Bætið kaperslegi út í eftir smekk.
Kryddið með salti og nýmöluðum svörtum pipar og blandið varlega saman.
Berið salatið fram volgt eða við stofuhita.
Kartöflusalatið er tilvalið með grilluðum fiski, kjöti, kjúklingi eða grænmetisréttum. Það er einnig gott eitt og sér sem léttur hádegisréttur.
Fleira áhugavert:
– Rabarbari – Póstlistinn – Selfoss – Kaldir réttir — Kvennaskólar –