Grænmetisætur fá síður ristilkrabbamein
Hvatinn.is birti eftirfarandi grein: Grænmetisætur fá síður ristilkrabbamein
Það er margt gott við að borða grænmeti og nú bætist enn í sarpinn. Samkvæmt nýrri rannsókn eru grænmetisætur mun ólíklegri til að fá krabbamein í ristil og endaþarm miðað við þá sem borða það sem flestir Íslendingar skilgreina sem venjulega fæðu.
Rannsóknin var unnin á 77.659 manns sem öll tilheyra samfélagi Sjöunda dags aðventista í Bandaríkjunum. Upplýsingum um fólkið var safnað á 5 ára tímabili, þar sem 380 tilfelli ristilkrabbameins og 110 tilfelli krabbameins í endaþarmi voru skráð.
Í heildina voru þeir sem skilgreindu sig grænmetisætur í 22% minni hættu á að fá krabbameina í ristil eða endaþarm, samanborið við þá sem neyttu kjöts. Best kom reyndar út að borða fisk en sleppa kjöti, en hjá þeim lækkuðu líkurnar á krabbameini um 43%. Þetta styrkir það sem áður var þekkt að neysla á rauðu kjöti virðist auka líkurnar á því að fá krabbamein í ristli.
Niðurstöður þessa faraldsfræðirannsókna gefa sterkar vísbendingar um að neysla á grænmeti geti aukið lífslíkur manna. Hins vegar er ekki hægt að fullyrða um að neysla á kjöti sér beinlínis óholl, þar sem þýðið er frekar smátt og afmarkað. Hvernig grænmetisfæða dregur úr líkunum á krabbameinum er ekki skilgreint í þessari rannsókn, en vitað er að neysla á trefjaríku fæði er fyrirbyggjandi hvað varðar ristilkrabbamein auk þess að auðvelda meltingu. Þar að auki er líklegt að grænmetið innihaldi nauðsynleg næringarefni sem hjálpa líkamanum að berjast við stökkbreytingar og afleiðingar þeirra.
Hér má lesa fréttatilkynningu um rannsóknina sem unnin var af Michael J. Orlich og birtist í JAMA Internal Medicine nú á dögunum.
Sjá fleiri færslur: MATUR LÆKNAR
