Hundasúru- og steinseljupestó. Á Vísindavefnum kemur fram að hundasúrunafnið sé líklega komið af því að blöðin þóttu ekki eins góð og blöð túnsúrunnar. Hún hafi því verið kennd við hunda í niðrandi merkingu.
Hundasúrur eru góðar og örugglega bráðhollar. Hver man ekki eftir sér úti í náttúrinni étandi hundasúrur út í eitt? Þær má nota í ýmsan mat t.d. salöt, súpur, sósur og bökur. Já og svo útbúa pestó með hundasúrum
Hundasúru- og steinseljupestó
1 b nýtíndar hundasúrur
1 b basil
1 b steinselja
100 g kasjúhnetur, ristaðar á þurri pönnu
2-3 hvítlauksrif
2-2 dl ólífuolía
1 tsk sítrónubörkur
100 g parmesanostur eða fetaostur
svartur pipar
salt (ef þarf)
Maukið hundasúrur, basil, steinselju, heslihnetur, hvítlauk, olíu, sítrónubörk og ost saman í matvinnsluvél þar til blandan er sæmilega slétt. Saltið og piprið eftir smekk.
