Spænsk eplaterta með möndlum og sérrý
Það er eitthvað dásamlegt við góða eplatertu. Ilmurinn af eplum og kanil fyllir eldhúsið og kakan kemur úr ofninum gullin og ilmandi.
Í þessari tertu fær klassíska eplakakan smá spænskan blæ. Sérrý gefur mildan keim sem fer einstaklega vel með eplum, sítrónu og möndlum. Möndluflögurnar ofan á kökunni verða fallega ristaðar í ofninum og bæta bæði bragði og áferð.
Berið kökuna fram ylvolga, til dæmis með léttþeyttum rjóma eða vanilluís.
— SPÁNN — EPLATERTUR —
✨
Spænsk eplaterta
250 g hveiti
2 tsk lyftiduft
1 tsk kanill
85 g sykur
⅓ tsk salt
fínrifinn börkur af 1 sítrónu
2 egg
1½ dl ólífuolía
3 msk sérrý
safi úr 1 sítrónu
3 græn epli
1 dl möndluflögur.
Hitið ofninn í 180°C. Smyrjið kringlótt kökuform, um 22–24 cm í þvermál.
Blandið saman í skál: hveiti, lyftidufti, kanil, sykri, salti og sítrónuberki.
Bætið við eggjum, ólífuolíu, sérrý og sítrónusafa og hrærið þar til deigið er slétt.
Flysjið eplin ef þið viljið og skerið þau í bita, um það bil sykurmola að stærð.
Hrærið eplabitunum varlega saman við deigið.
Hellið deiginu í formið og stráið möndluflögum jafnt yfir.
Bakið kökuna í 40–45 mínútur, eða þar til hún er fallega gullin og prjónn sem stungið er í miðjuna kemur hreinn út.
Leyfið kökunni að kólna aðeins áður en hún er borin fram.
✨ Lítið ráð:
Ef þið viljið enn meira sérrýbragð má dreypa 1–2 matskeiðum af sérrý yfir kökuna þegar hún kemur úr ofninum.
.
— SPÁNN — EPLATERTUR —
✨