Marengsrúlluterta með myntukremi
Jóna Símonía Bjarnadóttir og Guðfinna M. Hreiðarsdóttir gefa út bækurnar Þjóðlegt með kaffinu og Þjóðlegar hnallþórur. Þær halda einnig úti síðu á fasbókarsíðunni Þjóðlegt með kaffinu. Þær eru báðar sagnfræðingar þannig að áhuginn á matargerð fyrri tíma á sér fræðilegan bakgrunn. Hugmyndin að bókunum kviknaði fyrir nokkrum árum þegar þær voru að velta fyrir sér hvað væri hægt að selja erlendum ferðamönnum sem væri bæði létt og fyrirferðarlítið í farangri.
Að þeirra sögn fengu bækurnar strax góðar viðtökur og seljast allvel. Fleiri bækur eru í farvatninu en það er helst tímaskortur sem tefur útgáfu þeirra enda eru þær stöllur í fullri vinnu en báðar starfa þær í Safnahúsinu á Ísafirði þar sem Jóna Símonía er forstöðumaður en Guðfinna starfsmaður skjala- og ljósmyndasafns. Undanfarin sumur hafa þær einnig rekið kaffihús í gamla samkomuhúsinu í Ögri við Ísafjarðardjúp undir merki Þjóðlegs með kaffinu og munu einnig hafa opið þar í sumar.
— #2017Gestabloggari24/52 — ÍSAFJÖRÐUR — MARENGS — MYNTA — ÞJÓÐLEGT — ÍSLENSKT — FASBÓK — JÓNA SÍMONÍA — GUÐFINNA HREIÐARSD —
.
Marengsrúlluterta með myntukremi
Marengsbotn:
5 eggjahvítur
275 gr sykur
50 gr möndluflögur
Þeytið eggjahvíturnar alveg stífar og bætið svo sykrinum smátt og smátt saman við uns deigið verður þykk og gljáandi. Smyrjið því á bökunarpappír, u.þ.b. 35 x 23 cm eða þannig að það passi á bökunarplötu. Stráið möndluflögunum yfir og bakið við 200°C í 10 mínútur, lækkið þá hitann í 160°C og bakið í 15 mínútur til viðbótar. Takið plötuna úr ofninum og hvolfið kökunni á bökunarpappír þannig að hliðin með möndlunum snúið niður. Látið kólna.
Fylling:
250 gr hvítt súkkulaði, brætt
250 ml rjómi
1 eggjahvíta
1 tsk piparmintudropar
Rjómi og eggjahvíta þeytt saman þar til rjóminn er stífur, bætið dropunum við í lokin. Kælið súkkulaðið aðeins og blandið því svo saman við rjómann með sleif, gætið þess að það blandist vel saman við án þess þó að þeyta. Setjið blönduna í kæli svo hún stífni aðeins.
Setjið fyllinguna ofan á marengsbotninn og rúllið upp. Gott er að geyma kökuna í kæli í smá stund svo fyllingin nái að stífna alveg. Skreytið kökuna, t.d. með jarðaberjum og mintu og stráið smá flórsykri yfir í lokin.
Í staðinn fyrir myntukremið má setja þeyttan rjóma með ávöxtum eða berjum, t.d. bláberjum.
🇮🇸
— #2017Gestabloggari24/52 — ÍSAFJÖRÐUR — MARENGS — MYNTA — ÞJÓÐLEGT — ÍSLENSKT — FASBÓK —
— MARENGSRÚLLUTERTA MEÐ MYNTUKREMI —
🇮🇸
