Sítrónuostakaka Jónu
Þessi fallega og frísklega sítrónuostakaka var á kaffiborðinu í glæsilegu kaffiboði Jónu Matthildar. Kakan er með stökkum kexbotni, silkimjúkri ostafyllingu og gljáandi sítrónuhlaupi. Sykraður sítrónubörkur setur svo hátíðlegan svip á kökuna.
Kakan hentar einstaklega vel með kaffinu, í afmæli, fermingar og önnur hátíðleg tilefni.
– OSTAKÖKUR – SÍTRÓNUR – Sítrónukökur – JÓNA MATTHILDUR –
.
Sítrónuostakaka Jónu
Kexbotn
½ pakki LU-kex með karamellu og kanil
½ pakki Haust-hafrakex
6 Hraunbitar
1 msk. sykur
50 g smjör, brætt
Aðferð
Hitið ofninn í 210°C.
Setjið kexið, Hraunbitana og sykurinn í matvinnsluvél og myljið vel. Blandið bræddu smjörinu saman við.
Þrýstið blöndunni jafnt í botninn á smelluformi, um 26 cm í þvermál. Bakið botninn í 7 mínútur og látið hann síðan kólna alveg.
Sítrónuostafylling
400 g rjómaostur
500 ml rjómi
1 dl sykur
2 dl mjólk
safi úr ½ sítrónu
2 tsk. vanilludropar
1 pakki Royal-sítrónuhlaup
1 bolli sjóðandi vatn
½ bolli kalt vatn
8 matarlímsblöð
Aðferð
Þeytið rjómann og setjið til hliðar.
Þeytið rjómaost og sykur þar til blandan verður slétt. Bætið mjólk, vanilludropum og sítrónusafa saman við og hrærið vel.
Leggið matarlímsblöðin í kalt vatn í nokkrar mínútur.
Setjið sítrónuhlaupsduftið í skál og hellið einum bolla af sjóðandi vatni yfir. Hrærið þar til duftið hefur leyst upp.
Kreistið vatnið úr matarlímsblöðunum og bætið þeim út í heita hlaupblönduna. Hrærið þar til matarlímið er alveg uppleyst og blandan tær. Bætið þá ½ bolla af köldu vatni saman við.
Hellið hlaupblöndunni varlega saman við rjómaostablönduna og hrærið þar til allt hefur blandast vel.
Blandið þeytta rjómanum varlega saman við með sleikju. Hellið fyllingunni yfir kaldan kexbotninn og kælið kökuna í að minnsta kosti 4–6 klukkustundir, helst yfir nótt.
Sítrónuhlaup ofan á
1 pakki Royal-sítrónuhlaup
1 bolli sjóðandi vatn
½–1 bolli kalt vatn
Leysið hlaupduftið upp í sjóðandi vatninu. Bætið kalda vatninu saman við og látið blönduna kólna þar til hún er farin að þykkna lítillega en er enn fljótandi.
Hellið hlaupinu mjög varlega yfir kalda ostafyllinguna. Gott er að láta það renna fyrst á bakið á matskeið svo yfirborð kökunnar skemmist ekki.
Setjið kökuna aftur í kæli þar til hlaupið hefur stífnað.
Sykraður sítrónubörkur
Skrautið er ekki nauðsynlegt en gerir kökuna sérstaklega fallega.
2 bollar sykur
1 bolli vatn
börkur af 4–5 sítrónum
Þvoið sítrónurnar mjög vel. Rífið eða skerið gula hlutann af berkinum í mjóar ræmur. Forðist að taka hvíta hlutann með þar sem hann er beiskur.
Sjóðið sykur og vatn saman við vægan hita í um 30 mínútur, eða þar til blandan hefur myndað þunnt síróp.
Setjið sítrónubörkinn í sírópið í nokkrum skömmtum. Takið ræmurnar upp, mótið þær að vild og látið kólna á bökunarpappír.
Skreytið kökuna með sykraða sítrónuberkinum rétt áður en hún er borin fram.
Glæsilegt kaffiboð Jónu Matthildar Frá vinstri: Þórkatla, Aðalheiður, Ólöf, Jóna Matthildur, Halldóra (Dóra), Braghildur og Stella.
Fleira áhugavert:
— Fiskur í ofni — Appelsínur – Skyrtertur – Fiskibollur — Nutella — Kryddbrauð — Sítrónukökur –