Bláberjabaka með marengs
Bláberjabaka með marengs er ein af þessum uppskriftum sem slær alltaf í gegn – hvort sem hún er borin fram sem eftirréttur eða með góðum kaffibolla. Sætur og stökkur marengsinn leggst fallega yfir safarík bláberin og mjúka fyllinguna, og saman verður þetta ómótstæðileg blanda.
Ef þú átt fersk íslensk bláber er þetta fullkomin leið til að nýta þau – en frosin bláber virka líka mjög vel.
Anna Björg Halldórsdóttir frænka mín kom með þessa ægigóðu bláberjaböku þegar hún og Halla Sólveig systir hennar buðu í kaffi á dögunum
.
.
Bláberjabaka með marengs
Botn
1 pakki heilhveitikex (t.d. Rugmo), mulinn
Smá brætt smjör (til að væta botninn)
Fylling
3–4 eggjarauður
1 dl sykur
1 dós rjómaostur
1 dós sýrður rjómi (18%)
Nokkrir dropar vanilludropar
Bláber (að vild)
Marengs
4 eggjahvítur
1,5 dl sykur
Svo má bæta við möndluspæni
Botn
Myljið kexið og dreifið í botninn á eldföstu móti. Hellið smá bræddu smjöri yfir svo botninn haldist saman.
Fylling
Þeytið eggjarauður og sykur vel saman þar til blandan verður ljós og létt.
Bætið rjómaosti og sýrðum rjóma saman við og hrærið þar til slétt.
Setjið vanilludropa út í.
Samsetning
Hellið fyllingunni yfir kexbotninn.
Dreifið bláberjum yfir eftir smekk.
Marengs
Þeytið eggjahvítur og sykur þar til stífur marengs myndast.
Dreifið marengsinum yfir bökuna.
möndluspænir ofan á
Bakstur
Bakið við 180°C (blástur) í um 15 mínútur, eða þar til marengsinn er orðinn fallega gullinbrúnn.
Fylgist vel með – hann getur dökknað hratt.
Berið fram volga eða kalda – hún er dásamleg hvort sem er!
Fleira áhugavert:
— Súrmjólkurbúðingur — Pignoli, hátíðlegar ítalskar smákökur — Lax í sítrónusósu — Gamaldags heilhveitibrauð — Peruterta, þessi gamla góða — Skúffukaka sem klikkar aldrei — Sírópskökur —