Daníel Arnarsson listakokkur og ljúflingur

Daníel Arnarsson frönsk lauksúpa súpur franska lauksúpu frakkland eggaldin svanhildargott ostakaka kirsuberjasósa hlaup þorlákshöfn samtökin 78 vinstri grænir
Daníel Arnarsson

Daníel Arnarsson listakokkur og ljúflingur

Ljúflingspilturinn hörkuduglegi Daníel Arnarsson er framkvæmdastjóri Samtakanna 78. Hann sleit barnsskónum í Þorlákshöfn en er nýbúinn að koma sér fyrir í fallegri íbúð í Vesturbænum ásamt unnustanum. Auk þess að vera fylginn sér og stefna hátt hjá Vinstri grænum er Daníel fínasti söngvari, söng eftirminnilega í giftinarveislu okkar Bergþórs.

.

FRAKKLANDEGGALDINGIFTINGÞORLÁKSHÖFNLAUKSÚPUR

.

„Með því að láta bununa ekki slitna freyðir ekki upp úr glasinu” þetta lærði ég þegar ég vann sem þjónn á veitingastað.
Frönsk lauksúpa

Frönsk lauksúpa

2 msk olía
5 meðalstórir laukar
3 hvítlauksrif
100 gr smjör
20 ml hvítvínsedik
50 ml hvítvín
1 ltr lambasoð
3 msk timian, þurrkað
3 msk salt
1 msk pipar
Brauðsneið fyrir hverja skál
Ostur

Laukur skorinn í sneiðar, best að skera hann í tvennt og sneiða hann svo frekar þunnt. Olía sett í pott og laukurinn hitaður þar á eftir. Best er að hita laukinn við vægan hita, salta smá, og hræra mjög reglulega. Það sem við ætlum að gera er að karamellisera laukinn, það getur tekið 45-50 mínútur. Þegar laukurinn er orðinn mjög glær þá set ég á aðeins meiri hita og hræri mun meira, þegar laukurinn er orðinn brúnn og áferðin nánast eins og á þykkri sultu þá er best að lækka aftur hitann og bæta þá við smjörinu, leyfa að malla í fimm mínútur og þá edikinu og hvítvíninu, gott er að skafa vel af botninum því þar er allt góða bragðið. Soði bætt við ásamt timian, salti og pipar, leyft að malla í að minnsta kosti 20 mínútur við vægan hita, en þó í lagi að súpan malli í 2-3 tíma, við mjög vægan hita.
Ef þú vilt gera súpuna enn meira fansí en hún er þá er gott að skera niður brauð, langbest ef það er nokkurra daga gamalt, setja brauðið ofan í súpuna svo vel af osti (hvaða ostur sem bráðnar virkar hér) og smella súpuskálinni undir grill (í flestum ofnum er grillstilling) í örfáar mínútur. Ef þú átt ekki súpuskálar sem þola svo mikinn hita þá má setja brauð með osti undir grillið í smá stund og setja svo grillaða ostabrauðsneiðina ofan í súpuskálina, það er alveg jafnfínt.

Eggaldin Parmigiano

Eggaldin Parmigiano

3 stór eggaldin
5 msk salt
1 stór laukur
4 hvítlauskrif
2 dósir hakkaðir tómatar
50 ml tómatpúrra
2 msk timian, þurrkað
2 msk salt
2 msk pipar
1 msk sykur
200 gr brauðraspur
1 msk basilika, þurrkuð
1 msk timian, þurrkað
1 msk oregano, þurrkað
1 msk salt
1 msk pipar
3 egg
100 ml mjólk
200 gr hveiti
1 tsk cayenne pipar
500 ml olía, steikingarolía ekki ólífuolía
30 ml ólífuolía
3 kúlur Mozarella
200 gr ostur
100 gr Parmesan ostur

Þetta virðist vera afar mikið af hráefnum en þetta er gríðarlega einfalt. Fyrst af öllum skerum við niður eggaldin, um 1-2 cm sneiðar, leggja sneiðarnar á bökunarplötu og salta vel yfir, leyfa þessu að standa í tæpa klst (athugaðu þú getur gert marinara á meðan). Þetta gerir það að verkum að eggaldinið losar sig við umframvökva og verður lungamjúkt og sætt, en ekki beiskt og stökkt undir tönn.
Svo er það marinara, þú mátt kaupa tilbúna marinara, það er allt í góðu. Steikja laukinn í ólífuolíu þar til hann verður mjúkur og glær, bæta svo hvítlauk við og steikja áfram í 3-4 mínútur. Svo má bæta við öllum kryddunum, salti og pipar, ásamt tómatpúrru og hökkuðum tómötum. Marinaran er klár eftir að þetta hefur mallað í 20 mínútur en það er bara betra að láta hana malla heillengi, alveg 3-5 klst ef vill, muna þá að hafa lokið á pottinum og hitan mjög vægan. Þegar marinaran er klár þá er best að byrja á að steikja eggaldinið.
Gott er að þurrka saltið af eggaldininu, bara svo það verði ekki of salt (það hefur reyndar aldrei komið fyrir hjá mér, en við erum mis-salt-þolin). Eggaldisneiðunum er velt upp úr hveiti, svo eggja- og mjólkurblöndunni (píska saman eggin og mjólkina) og þar á eftir í brauðraspinum (muna að setja kryddin, salt og pipar í raspinn og blanda vel).
Þetta er gert á góðu færibandi þar til allar eggaldinsneiðarnar eru vel brauðrasphjúparðar. Olía, steikingarolía (t.d. sólblómaolía) er hituð á pönnu, olían á að ná 3-4 cm upp barmana á pönnunni eða pottinum sem þú ert að steikja í. Leggðu sneiðarnar varlega í heita olíuna og hitið þar til eggaldinsneiðarnar eru gullnar, leyfið svo að liggja á grind svo umframolían megi leka af. Þá verða sneiðarnar stökkar og góðar.
Eftir að þú hefur steikt allar sneiðarnar þá er um að gera að setja allt saman!
Þú byrjar á því að setja smá marinara í eldfast mót, svo raðarðu eggaldisneiðum í eitt lag, þar á eftir smellirðu marinara yfir, þá osti, mozzarella, parmesan eða hvaða osti sem bráðnar sem er. Svo endurtekurðu, eggaldin, marinara, ostur, þar til þú ert búin með allt hráefnið! Þá stráirðu góðum slatta af osti yfir og bakar í ofni við 200 í 45-50 mínútur.

Svanhildargott: LU kex í botninum, þá rjómaostur og rjómi og loks kirsuberjahlaup efst

Svanhildargott

250 ml kirsuberjasósa
3-4 matarlímsblöð
7-8 Lu Kex, Bastogne
30 gr smjör
2 dósir Philadelphia rjómaostur (alls ekki light eitthvað)
5-6 msk flórsykur (meira eða minna, allt eftir smekk)
3-4 msk rjómi
vanilla eða sítrónubörkur

Byrjaðu á að setja matarlímsblöð í kalt vatn, eitt í einu. Svo skal hita kirsuberjasósuna við vægan hita. Þegar sósan er orðin heit og matarlímsblöðin orðin vel slepjuleg þá er matarlímsblöðin einfaldlega tekin úr vatninu, kreist og sett í heita sósuna. Hrært þar til blöðin hafa leysts upp. Sósan lögð til hliðar.
Lemdu bastogne kökur þar til þær verða að mylsnu, mjög gott er að hafa nokkra stóra bita líka, þetta þarf ekki að vera fullkomið. Smjör brætt á pönnu við vægan hita og kexinu bætt við. Blandað vel saman þar til eldhúsið ilmar af smjöri og kanil, tekur um 3-4 mínútur. Settu kexið í skál eða dreifðu í nokkur glös (kannski 3-4 meðalstór glös eða 5-6 lítil).
Þeyttu rjómaost og rjóma saman. Smakkaðu til með flórsykrinum og bragðbættu með vanilludropum eða sítrónuberki, allt eftir smekk.
Helltu rjómaostblöndunni ofan á kexið og þar á eftir kirsuberjasósunni sem ætti nú að vera við stofuhita.
Settu í ísskáp í 2-3 tíma eða yfir nótt. Þetta er rosalega gott að gera deginum áður.

.

FRAKKLANDEGGALDINGIFTINGÞORLÁKSHÖFNLAUKSÚPUR

— DANÍEL ARNARSSON —

.

Auglýsing

Meira úr sama flokki

Vöfflur – klassísk uppskrift úr bókinni Við matreiðum

Vöfflur. Fátt er dásamlegra en ilmur af nýbökuðum vöfflum. Það er einhver óútskýrð hlýja sem fylgir þeim. Hér er uppskrif úr hinni ágætu bók Við matreiðum, bók sem ég eignaðist fyrir 35 árum og fletti reglulega upp í. Við matreiðum er hin fínasta bók, hún kom fyrst út árið 1976 og nýlega kom sjötta útgáfan út.

Peruterta, þessi gamla góða

20160830_152036

Peruterta. Í minningunni voru perutertur í öllum barnaafmælum og flestum fermingarveislum í mínu ungdæmi. Botnarnar voru mjúkir og gegnblautir. Þegar ég sá á fasbókinni að Borghildur Jóna var að baka eina slíka fyrir afmæli sonar síns, fékk ég fortíðarþráhyggjukast og bað hana um mynd og uppskrift. Ég bara stóðst ekki mátið.

Hjónabandssæla

Hjónabandssæla

Mjúk og góð hjónabandssæla er góð með kaffinu. Stundum verða hjónabandssælur seigar, kannski vegna þess að þær eru bakaðar of lengi. En eflaust líkar einhverjum að hafa þær seigar.