Borðskreyting með íslenskum blómum
Það þarf ekki dýrar skreytingar til að skapa fallegt og hlýlegt matarborð. Á sumrin gefur íslensk náttúra okkur ótal möguleika og oft nægir stutt gönguferð til að safna því sem þarf í fallega borðskreytingu.
Við gerð þessarar skreytingar voru notaðar þrenningarfjólur, sóleyjar, blóðberg, bláklukkur, gulmura og mosi, allt sett saman á gamlan mosavaxinn plankabút sem gefur skreytingunni náttúrulegan og látlausan svip. Það er fallegt að blanda villtum blómum saman við grænar greinar eða afskorin garðblóm ef vill.
Þegar borðskreyting er útbúin er mikilvægt að hafa hana ekki of háa svo gestir geti auðveldlega séð hver annan yfir borðið. Einnig þarf að huga að því að hún taki ekki of mikið pláss ef bera á fram marga rétti eða stórar skálar.
Best er að tína blómin skömmu áður en gestir koma og geyma þau í vatni þar til skreytingin er sett saman. Þá halda þau sér ferskum lengur, sérstaklega ef borðið stendur inni í hlýju.
Svona borðskreyting hentar jafnt fyrir sumarkvöldverð, veislur, brúðkaup, afmæli eða einfaldlega þegar gera á aðeins betur við fjölskylduna. Náttúruleg borðskreyting úr íslenskum blómum skapar einstaka stemningu og kostar nánast ekkert annað en smá tíma og hugmyndaflug.
— ÍSLENSKT — ÍSLAND — SKREYTINGAR —
.