Marengskrans með Grand Marnier-kremi og súkkulaði
Á matarferð okkar til Rómar fyrir nokkrum árum sagði Norðfirðingurinn Bergþóra Aradóttir frá glæsilegri viðhafnartertu sem hún bakar reglulega fyrir fjölskyldu og vini. Uppskriftin á rætur að rekja til um 30 ára gamals Gestgjafa, en Bergþóra hefur endurhannað gula kremið og aðlagað það að sínum smekk.
„Stundum geri ég bara tvö lög, þá verða sneiðarnar passlega stórar,“ segir Bergþóra.
Þetta er sannkölluð hátíðarterta: stökkur marengs, mjúkt Grand Marnier-krem með appelsínukeim, súkkulaðikrem og ferskir ávextir. Hún hentar einstaklega vel á veisluborð, um hátíðir eða þegar gera á sérlega vel við gesti.
– BERGÞÓRA ARADÓTTIR – NESKAUPSTAÐUR – ÍTALÍA – TERTUR – EFTIRRÉTTIR – MATARBORGIR – GRAND MARNIER –
.
Marengskrans með Grand Marnier-kremi og súkkulaði
Marengs
6 eggjahvítur, við stofuhita
½ tsk ,,cream of tartar“
Salt á hnífsoddi
5 dl sykur
Stillið ofninn á 150°C.
Leggið örk af bökunarpappír á bökunarplötu og gerið hring. 28 cm þvermál á örkina. Teiknið annan hring 13 cm þvermál inn í þann stóra (Notið t.d. botn úr 28 cm tertumóti til að teikna stærri hringinn eftir og t.d. undirskál fyrir minni hringinn) Teiknið eins hringi á tvær arkir í viðbót.
Þeytið saman eggjahvíturnar, cream of tartar og saltið í stórri skál. Bætið sykrinum smátt og smátt saman við og þeytið vel þar til blandan er stíf og hefur fengið á sig fallegan gljáa.
Skiptið marengsdeiginu í þrjá jafna hluta. Setjið marengsinn í sprautupoka og sprautið hlutunum í hringina sem búið er að gera á bökunarpappírsarkirnar, byrjið innst.
Bakið marengsinn í 1 klukkustund. Slökkvið síðan á ofninum og látið marengsbotnana standa í ofninum í nokkrar klukkustundir eða yfir nótt.
Grand Marnier-krem
2 ½ dl + 2 msk sykur
10 eggjarauður
½ dl appelsínuþykkni
6 msk ferskur sítrónusafi (síið safann)
1/3 tsk salt
250 g mjúkt smjör
1 msk rifinn appelsínubörkur
2 msk Grand Marnier
2 ½ dl rjómi, þeyttur
Setjið sykurinn, eggjarauðurnar, appelsínusafann, sítrónusafann og saltið í pott yfir lágum hita og hrærið vel saman. Hrærið í pottinum þar til kremið þykknar, u.þ.b. 20 mín.
Kremið má alls ekki sjóða.
Takið pottinn af hitanum og hrærið smjörinu í smábitum saman við kremið. Bætið appelsínuberkinum og líkjörnum saman við.
Setjið kremið í skál og breiðið plast yfir, þrýstið því alveg ofan á kremið svo ekki myndist skán.
Kremið má búa til allt að 2 dögum áður.
Súkkulaðikrem
3 msk smjör
2 msk síróp
150 g suðusúkkulaði
2 tsk Grand Marnier
3 msk sjóðandi vatn
Bræðið smjörið í góðum skaftpotti yfir meðalhita.
Bætið sírópinu saman við og látið sjóða í 1 mín., hrærið stöðugt í pottinum á meðan. Takið pottinn af hitanum og hrærið súkkulaðinu og líkjörnum saman við.
Hrærið þar til kremið er kekkjalaust. Hrærið sjóðandi vatninu saman við.
Samsetning og skraut
Afhýðið appelsínurnar (nota má niðursoðnar mandarínur, það er talsverð vinna að afhýða appelsínulaufin). Losið appelsínulaufin varlega í sundur og fjarlægið himnuna utan af þeim. Losið marengshringina varlega af bökunarpappírnum.
Setjið einn hring á kringlótt fat. Smyrið helmingnum af appelsínukreminu á hringinn og setjið helminginn af þeytta rjómanum ofan á kremið.
Setjið annan hring ofan á, smyrjið hann með hinum helmingnum af kreminu og þeytta rjómanum.
Leggið þriðja hringinn ofan á og smyrjið hann varlega með súkkulaðikreminu setjið marengshringinn í kæli og látið hann standa yfir nótt svo marengsinn nái að mýkjast.
Skreyting
Jarðaber, kiwi og fersk mynta til skrauts
3 msk appelsínumarmelaði
1 msk Grand Marnier
Skreytið hringinn rétt fyrir framreiðslu með appelsínulaufum, litlum ræmum af appelsínuberki, ferskum ávöxtum eftir smekk og myntulaufum ef þau eru fáanleg. Hitið saman appelsínumarmelaði og Grand Marnier í litlum potti.
Penslið ávextina með volgri blöndu af appelsínumarmelaði og Grand Marnier. Það gefur fallegan gljáa. Berið hringinn fram kaldan með viðbótar þeyttum rjóma ef vill.
ATH
Viðauki sem vonandi þarf ekki að nota.
Appelsínusafi ef þú færð ekki þykkni.
2,5 dl. Appelsínusafi sjóða niður um helming.
0,5 dl. Í krem (þykkni)
Fleira áhugavert:
– Kryddbrauð — Skyrtertur – Kaffimeðlæti — Kartöflur — Fiskur í ofni — Skyrtertur —