Hnoss – sannkallað hnossgæti í Hörpu
Það er ævintýraför að skella sér á Hnoss í Hörpu í svokallaðan bröns, eða dögurð eða hvað við eigum að kalla léttan hádegisverð með fjölbreyttum réttum. Staðurinn er mjög hlýlegur, þar er bjart og góð hljóðvist, þjónusta góð og notaleg og eldamennskan fyrsta flokks.
— VEITINGA- OG KAFFIHÚS — FERÐAST UM ÍSLAND — ÍSLENSKT — HNOSSGÆTI —
.
Lífið er of stutt fyrir lélegar bubblur
Við hittum Fanneyju Dóru landsliðskokk, sem hleypti Hnossi af stokkunum ásamt Stefáni Viðarssyni. Þau eru með þeim hressari í bransanum og ákváðu strax að gera staðinn hlýlegan, opna inn í eldhús og hafa langan setubar. Útkoman er frábær, en þau fást við ýmislegt fleira. Nýlega fóru þau í kampavínssmökkun í Frakklandi, þar sem þau merktu við hvað þeim fannst gott við hvert vín. Út frá því er verið að framleiða sérstakt kampavín fyrir Hnoss. En eins og Fanney Dóra orðar það, þá er lífið of stutt fyrir lélegar bubblur. „Maður gæti orðið fyrir strætó í dag þannig að það er eins gott að vera búinn að fá góðar bubblur. Það þurfa að vera góðar bubblur og góður klósettpappír. Þá er lífið bara fínt.“ En það á sannarlega við um matföngin, lífið er of stutt fyrir bragðdaufan og ófrumlegan mat gæti verið kjörorðið á Hnoss.
Það kemur flest á óvart á hlaðborðinu, ekki er það bara fallegt, heldur líka hnossgæti hvert og eitt. Sem dæmi gefur þarna að líta villisveppa-hummus, hvannarsmjör, reyktar gulrætur, frumlegasta brauðterta á Íslandi sem var jafnframt lostæti, fjölbreytt salöt. Svo eru hefðbundnari réttir af ýmsu tagi á smærri skömmtum, reyktur lax með hleyptu eggi, rauðspretta með kartöflum.
— VEITINGA- OG KAFFIHÚS — FERÐAST UM ÍSLAND — ÍSLENSKT — HNOSSGÆTI —
.
