Sírópskökur
Þessar kökur eru stökkar og ljúffengar og minna á Lu kex. Kristín Bjarnadóttir í Kvennakór Ísafjarðar er ein af þessum sem hefur bæði smekk og tilfinningu fyrir góðum mat og bakstri. Hún er reyndar líka sérfræðingur í að sjá veröldina björtum augum og mættum við mörg taka hana til fyrirmyndar í því efni. Kristín bakar sírópskökurnar oftast í kringum Skíðaviku og þá eru þær kallaðar Skíðafélagskökur, en auðvitað má baka þær hvenær sem er ársins. Kristín varð fúslega við því að gefa uppskriftina.
— SÍRÓPSKÖKUR — ÍSAFJÖRÐUR — KVENNAKÓR ÍSAFJARÐAR —
.
Sírópskökur
600 gr hveiti
400 gr sykur
2 tsk kanill kúfaðar
2 tsk matarsódi
2 tsk lyftiduft
400 gr smjörlíki, við stofuhita
4 msk síróp kúfaðar
1 egg
vanilludropar u.þ.b. 1/2 glas.
Blandið þurrefnum vel saman með sleif í skál. Myljið smjörlíki saman við með höndum. Bætið síðast við sírópi, eggi og vanilludropum. Skiptið í sex hluta. Deigið er svolítið klesst, en það er í lagi. Búið til rúllur úr hverjum hluta, setjið tvær rúllur í einu á plötu með bökunarpappír og fletjið svolítið út með fingrum.
Bakið við 180-190°C með blæstri í u.þ.b. 15 mín. Skerið í bita meðan kökurnar eru heitar. Látið kólna vel áður en sett er í kökubox.
— SÍRÓPSKÖKUR — ÍSAFJÖRÐUR — KVENNAKÓR ÍSAFJARÐAR —
.
