Chili con carne
Við tengum Chili con carne við Mexíkó en eitthvað virðist uppruninn vera á reiki, einnig er sagt að hann sé frá suðurríkjum Bandaríkjanna og hafi þróast þar meðal mexíkóskra innflytjenda. Hvað um það Chili con carne (chili með kjöti) er vinsæll um allan heim. Kjötlausa útgáfan er ekki síður góð og kallast Chili sin carne (án kjöts)
.
Chili con carne
Auðvelt er að breyta chili con carne í chili sin carne með því að nota vegan hakk.
1 rauðlaukur
1 rauð paprika
4 hvítlauksgeirar
1 msk olía
500 g nautahakk
1 msk chili duft
1 tsk paprikuduft
1 tsk kúmmín
1 stór teningur grænmetiskraftur leystur upp í 2 dl sjóðandi vatni
400 g dós saxaðir tómatar
1 tsk ítalskt krydd
½ msk síróp (eða sykur)
2 msk tómatpúrra
Salt og pipar
410 g dós af rauðum nýrnabaunum
Meðlæti: hrísgrjón, sýrður rjómi, steinselja
Saxið rauðlauk, papriku og hvítlauk. Steikið rauðlaukinn við meðalhita á pönnu, bætið svo papriku og hvítlauk út í þar til paprikan meyrnar. Setjið í skál.
Steikið kjötið á pönnunni, myljið með spaða, svo að það verði ekki klumpar. Kryddið með chili, paprikudufti og kúmmíni.
Þegar kjötið er gegnsteikt, bætið þá við steikta grænmetinu, kraftinum, tómötunum, ítalska kryddinu, sírópi og tómatpúrru. Saltið og piprið. Sjóðið áfram í 20 mínútur.
Bætið baunum út í, smakkið til, meira af þessu og meira af hinu og sjóðið áfram í 10 mín.
Látið nú standa meðan hrísgrjónin eru soðin. Skreytið með sýrðum rjóma og steinselju.
.
