Vínarborg matarborgin vinalega

Vínarborg matarborgin vinalega

Vínarborg er ein af þessum borgum sem sameinar glæsileika, sögu og matarmenningu á einstakan hátt. Borgin er rík af stórkostlegum byggingum Habsborgaranna og á hverju horni má finna eitthvað áhugavert – hvort sem það er safn, kaffihús eða veitingastaður.

Best er að byrja á göngutúr um miðborgina, frá Hofburg yfir á Maria-Theresien-Platz, framhjá þinghúsinu, ráðhúsinu og Burgtheater. Þar fær maður strax tilfinningu fyrir þessari miklu sögu og reisn sem einkennir borgina.

Við dvöldum í viku í Vín og nutum þess að „borða okkur í gegnum borgina“. Klassískir réttir eins og Wienerschnitzel og Tafelspitz eru áberandi og fást víðast hvar, en oft er skemmtilegast að finna litla staði utan helstu ferðamannagata.

Við vorum til dæmis mjög ánægðir með Ofenloch og Zu den drei Hacken – staði með karakter og sögu. Þar er andrúmsloftið rólegra og maturinn yfirleitt betri.

Í Vín er líka ótrúlegt úrval af alþjóðlegum veitingastöðum og ítalskir staðir eru sérstaklega áberandi. Við prófuðum Cavalluccio og Danieli og fengum frábæran mat á báðum stöðum.

— VÍNARBORG — AUSTURRÍKI — MATARBORGIR — SACHERTERTA — MOZART — BEETHOVEN —

.

Demel kaffihúsið átti í áratuga löngum deilum við Sacher hótelið um uppruna og rétt til að nota nafnið „Sachertorte“. Báðir aðilar gátu í lokin haldið áfram að framleiða sína útgáfu af hinni frægu köku, sem ég sagði vera ofmetnustu tertuna eftir að hafa smakkað hana. SJÁ HÉR Á Demel er mikil saga og stemning, en mörg önnur kaffihús Vínarborgar eru ekkert síðri.

Albertina museum

Albertina safnið í Vínarborg var stofnað árið 1776 af Alberti Kaspar von Sachsen-Teschen, sem var tengdasonur keisaraynjunnar Maríu Teresu og mágur Jósefs II, keisara. Albert hertogi, sem safnið er nefnt eftir, var mikill listunnandi og safnaði verulegu magni af grafíkverkum og teikningum. Vel skipulagt og ekki of yfirgripsmikið, mæli með.

Á Plachutta fengum við austurrískt gúllas með dumplings. Það var því miður ekkert sérstakt og þjónustan olli vonbrigðum – sem sýnir að jafnvel þekktir staðir standa ekki alltaf undir væntingum.

Elsta kaffihúsið í Vínarborg er Café Frauenhuber, sem er talið hafa verið stofnað árið 1824. Þetta kaffihús er þó ekki aðeins þekkt fyrir aldur sinn, heldur einnig fyrir merkilega sögu. Það er staðsett í hjarta borgarinnar og er síðasta staðurinn þar sem tónlistarmennirnir Wolfgang Amadeus Mozart og Ludwig van Beethoven komu fram opinberlega.

Schönbrunn

Schönbrunn höllin var fyrrum sumarsetur Habsborgara. Höllin var reist á 17. öld og er dæmi um stórfenglega barokkarkitektúr. Hún er umkringd víðáttumiklum görðum, þar á meðal hinum fræga Gloriette-sigurboga, dýragarði (sem er sá elsti í heimi), og mikilfenglegum gosbrunnum.
Schönbrunn er heimsminjaskrá UNESCO og laðar að sér 4-5 milljónir ferðamanna ár hvert. Höllin er einnig þekkt fyrir stórkostlegar innréttingar, þar á meðal Speglasalinn, þar sem Mozart hélt tónleika sem barn. Schönbrunn-höllin er fyrrum sumarsetur Habsborgara og einn vinsælasti ferðamannastaður Austurríkis, með milljónir gesta árlega.

Hofburg höllin

Hofburg höllin í Vínarborg er ein af helstu og sögulegustu byggingum Austurríkis. Hún var aðalsetur Habsborgarættarinnar í meira en sex aldir og er nú bústaður forseta Austurríkis. Í hölli er safn um Jósef 1. og Elísabetu keisaraynju. Hofburg-höllin er ekki síður merkileg og þar má meðal annars sjá vistarverur keisarahjónanna Frans Jósefs og Sisi.

Topp tíu listinn yfir þjóðlegustu réttina í Austurríki gæti litið svona út:

1. Vínarsnitsel. Kálfasneið, hulin raspi og steikt þar til hún er gullinbrún. Oft borin fram með kartöflusalati, sítrónusneið og stundum trönuberjasósu.

2. Tafelspitz. Soðið nautakjöt, oft borið fram með soðnum kartöflum, ristuðu brauði, eplamússi, og ferskrótarsósu. Rétturinn er talinn vera einn af eftirlætisréttum Franz Jósefs I. keisara.

3. Sacherterta. Fræg súkkulaðiterta sem samanstendur af þéttri súkkulaðiköku, ferskjusultu, og súkkulaðihjúp.

4. Apfelstrudel. Þunnbakaður réttur með fyllingu úr sætu eplamauki, rúsínum, kanil og sykri, oft borið fram með rjóma eða vanillusósu. Einn þekktasti eftirréttur Austurríkis.

5. Kaiserschmarrn. Lúxusútgáfa af pönnukökum, rifin í bita og oft borið fram með eplamús, plómusósu, eða rúsínum. Rétturinn er tengdur Franz Jósef I. keisara.

6. Brettljause. Kaldur réttur með sneiðum af ýmsum gerðum af kjöti, pylsum, osti, og súrum gúrkum, oft borið fram á trébretti.

7. Gúllas. Sterkkrydduð kjötsúpa eða pottréttur, upphaflega frá Ungverjalandi, en hefur verið tekin upp í austurrískri matargerð, enda voru þessi og fleiri lönd undir einni stjórn á Habsborgartímabilinu.

8. Marillenknödel. Apríkósukúlur gerðar úr kartöfludeigi eða öðru deigi, fylltar með apríkósu og veltar upp úr raspi.

9. Frittatensuppe. Tær súpa með sneiðum af pönnukökum sem skornar eru í þunnar ræmur.

10. Knödel. Kúlur gerðar úr brauði, kartöflum eða hveiti, sem eru oft borið fram sem meðlæti með kjöti eða í súpum. Knödel eru til í mörgum útfærslum, bæði sætar og saltar.

Vínarborg stendur fyllilega undir orðspori sínu sem matarborg.
Hér blandast saman klassísk austurrísk matargerð, alþjóðleg áhrif og einstök kaffihúsamenning – allt í fallegu og sögulegu umhverfi.

— VÍNARBORG — AUSTURRÍKI — MATARBORGIR — SACHERTERTA — MOZART — BEETHOVEN —

.