Snæfinnur snjókarl
Snæfinnur snjókarl
var með snjáðan pípuhatt,
gekk í gömlum skóm og með grófum róm
gat hann talað rétt og hratt.
„Snæfinnur snjókarl:
Bara sniðugt ævintýr,“
segja margir menn en við munum enn
hve hann mildur var og hlýr.
En galdrar voru geymdir
í gömlu skónum hans.
Er fékk hann þá á fætur sér
fór hann óðara í dans.
Já, Snæfinnur snjókarl,
hann var snar að lifna við
og í leik sér brá, æði léttur þá,
uns hann leit í sólskinið.
Snæfinnur snjókarl
sneri kolli himins til
og hann sagði‘ um leið: Nú er sólin heið
og ég soðna hér um bil.
Svo hljóp hann einn, var ekki seinn
og alveg niður á torg.
Og með sæg af börnum söng hann lög,
bæði í sveit og höfuðborg.
Já, Snæfinnur snjókarl
allt í snatri þetta vann,
því að yfir skein nú sólin hrein
og hún var að bræða hann.
(Erl. lag / Hinrik Bjarnason)
🎄🎄 🎄🎄
Skreytum hús
Skreytum hús með greinum grænum,
fa la lalla la, la lalla la.
Gleði ríkja skal í bænum,
fa la lalla la, la lalla la.
Tendrum senn á trénu bjarta,
falla la lalla la, la la la,
tendrum ljós í hverju hjarta,
fa la lalla la, la lalla la.
Ungir, gamlir, allir syngja,
fa la lalla la, la lalla la,
engar sorgir hugann þyngja,
fa la lalla la, la lalla la.
Jólabjöllur blíðar kalla,
falla la lalla la, la la la,
boða frið um veröld alla,
fa la lalla la, la lalla la.
(Lag frá Wales/Elsa Guðjónsson
🔔 🔔 🔔
Jólin alls staðar
Jólin, jólin alls staðar
með jólagleði og gjafirnar.
Börnin stóreyg standa hjá
og stara jólaljósin á.
Jólaklukka boðskap ber
um bjarta framtíð handa þér
og brátt á himni hækkar sól,
við höldum heilög jól.
(Jón Sigurðsson/Jóhanna G. Erlingsson)
🎄🎄 🎄🎄
Jólasveinninn minn
Jólasveinninn minn, jólasveinninn minn
ætlar að koma í dag
með poka af gjöfum og segja sögur
og syngja jólalag.
Það verður gaman þegar hann kemur,
þá svo hátíðlegt er.
Jólasveinninn minn, káti kallinn minn
kemur með jólin með sér.
Jólasveinninn minn, jólasveinninn minn
ætlar að koma í kvöld
ofan af fjöllum, með ærslum og köllum
hann labbar um holtin köld.
Hann er svo góður og blíður við börnin
bæði fátæk og rík.
Enginn lendir í jólakettinum,
allir fá nýja flík.
Jólasveinninn minn, jólasveinninn minn
arkar um holtin köld
af því að litla jólabarnið
á afmæli í kvöld.
Ró í hjarta, frið og fögnuð
flestir öðlast þá.
Jólasveinninn minn, komdu karlinn minn,
kætast þá börnin smá.
(Erl. lag/Ómar Ragnarsson)
🔔 🔔 🔔
Ég sá mömmu
Ég sá mömmu kyssa jólasvein
við jólatréð í stofunni í gær.
Ég læddist létt á tá
til að líta gjafir á,
hún hélt ég væri steinsofandi Stínu dúkku hjá.
Og ég sá mömmu kitla jólasvein
og jólasveinninn út um skeggið hlær.
Já, sá hefði hlegið með
hann faðir minn, hefði hann séð
mömmu kyssa jólasvein í gær.
(Erl. lag/Hinrik Bjarnason)
🎄🎄 🎄🎄
Ó Grýla
Grýla heitir grettin mær,
Í gömlum helli býr,
hún unir sér í sveitinni
við sínar ær og kýr.
Hún þekkir ekki glaum og glys
né götulífsins spé
og næstum eins og nunna er,
þótt níuhundruð ára sé.
Ó Grýla, ó Grýla, ó Grýla
í gamla hellinum.
Hún Grýla er mikill mathákur
og myndi undra þig.
Með malarskóflu mokar alltaf
matnum upp í sig.
Og ef hún greiðir á sér hárið,
er það mesta basl,
því það er reitt og rifið
eins og ryðgað víradrasl.
Ó Grýla, ó Grýla, ó Grýla
í gamla hellinum.
Og hjá þeim Grýlu og Leppalúða
ei linnir kífinu,
þótt hann Grýlu elski alveg
út úr lífinu.
Hann eltir hana eins og flón,
þótt ekki sé hún fríð.
Í sæluvímu sama lagið
syngur alla tíð:
Ó Grýla, ó Grýla, ó Grýla,
ég elska bara þig.
(Ómar Ragnarsson)
🔔 🔔 🔔
