Sveskju- og fíkjuterta. Allra vinsælasta uppskriftin á þessu bloggi frá upphafi er Sveskju- og döðluterta (þar á eftir kemur rabarbarapæið fræga). Þetta kemur svo sem ekkert sérstaklega á óvart, tertan er bæði ljúf og bragðgóð. Fyrir ekki svo löngu hitti ég konu sem fór að tala um Sveskju- og döðlutertuna, hún sagðist ekki hafa átt döðlur og notaði fíkjur í staðinn og tertan væri jafngóð ef ekki betri með þeim í.
- kona hringdi og bað mig að skýra betur út hvað ég ætti við með góðu dökku súkkulaði og góðri matarolíu. Sjálfur er ég hrifinn af um 70% dökku súkkulaði en ekki of sætu. Gjarnan nota ég 70% Síríus, Saveurs & Nature eða Green and Black´s. Í hráfæði nota ég alltaf extra virgin ólífuolíu.
— HRÁTERTUR — SVESKUR — FÍKJUR —
Sveskju- og fíkjuterta
2 dl fíkjur (leggið í bleyti ef þarf)
2 dl sveskjur
2 dl valhnetur
1 banani
2 dl kókosmjöl
safi úr 1/3 sítrónu
1/2 tsk vanillu extract – eða 1 tsk vanillusykur
1/3 tsk salt
2 msk kókosolía – fljótandi
1 msk góð matarolía
1 msk vatn
Saxið frekar smátt fíkjur, sveskjur, valhnetur og banana og setjið í skál – eða setjið í matvinnsluvél. Bætið út í kókosmjöli sítrónusafa, vanillu og salti. Blandið saman kókosolíu, matarolíu og vatni og setjið út í og hrærið vel saman. Látið í form, þjappið vel og kælið
krem:
150 g gott dökkt súkkulaði
1-2 msk góð matarolía
Bræðið saman við lágan hita og hellið yfir kökuna.
Best finnst mér að setja kringlótt form beint á tertudisk, „deigið” ofan í og kremið á. Síðan er hún látin standa í nokkrar klst í ísskáp. Þá er heitum hníf rennt meðfram kökunni, formið tekið utan og voilà – dásamleg terta tilbúin
– – FLEIRI HRÁTERTUR –
.
.
