Paella með sjávarréttum
Alveg frá því ég bragðaði paellu í fyrsta sinn hef ég notað hvert tækifæri til að njóta þessa fræga spænska réttar. Nýlega bauð Margrét, sem rekur ferðaskrifstofuna Mundo (við fórum með henni til Mont Blanc), okkur í paellu. Hún bjó í nokkur ár á Spáni og þekkir því vel til spænskrar matarmenningar.
Margrét segir að fáir réttir séu jafn „pólitískir“ og spænska paellan. Í gamla daga var sagt að auðveld leið til að komast að því hvort gyðingar eða márar sem höfðu tekið kristni væru einlægir væri að bjóða þeim í paellu. Ef þeir borðuðu ekki réttinn vakti það grunsemdir – því hefðbundin paella innihélt oft svínakjöt.
Að öllu gamni slepptu er paella réttur sem kenndur er við Valencia-hérað á Spáni. Þar hefur hrísgrjónarækt verið mikil um aldir og hrísgrjón hafa verið borðuð þar allt frá 15. öld. Í dag eru til ótal afbrigði af paellu – sjávarréttapaella, blönduð paella með kjöti og fiski og jafnvel grænmetisútgáfur.
Paellan sem hér er gerð er aðlöguð að íslenskum aðstæðum og hráefnum.
.
— PAELLA — SPÁNN — MUNDO — HUMAR — MARGRÉT JÓNSD NJARÐVÍK —
🦞
Paella með sjávarréttum – uppskrift fyrir 6-8 manns
Tími: undirbúningur ca. 30 mín og matreiðsla 60 mínútur
Kjúklingur (ca. kíló) skorinn í hluta eða einn bakki af kjúklingabringum
500 g lúða
12 fallegir stórir humrar eða risarækjur
250 ml ólífuolía – Frábær spænsk ólívuolía fæst í Melabúðinni – Til eru nokkrar tegundir eco, manzanilla, morisca og arbiquina
1 b – grænar litlar baunir (ekki Ora heldur ferskar frystar)
1 rauð paprika
5 tómatar
600 g risottohrísgrjón
250 ml vatn
saffran – slatti því gefur guðdómlegt bragð
rauð paprika
hvítlaukur – 4 rif
persilla -hálft búnt
laukur smátt skorinn (yfirleitt ekki notaðar í paellu en ég gerði það samt)
salt
nokkrar sítrónur
Hitið ólífuolíuna rólega í stórri pönnu. Best er að nota paellupönnu, en steypujárnspanna eða stór wokpanna virkar einnig vel.
Setjið kjúklingabitana út í olíuna og steikið þar til þeir verða fallega gylltir.
Bætið papriku og lauk út í og látið mýkjast í nokkrar mínútur.
Setjið síðan hvítlauk og saxaða persillu út í.
Rífið tómatana á rifjárni (spænskar húsmæður flysja þá fyrst – en það sleppa margir því) og bætið þeim út í pönnuna.
Látið þetta malla við vægan hita í um 15 mínútur.
Bætið saffrani og hrísgrjónum út í og hrærið þannig að hrísgrjónin þekjist olíunni. Látið þau steikjast í stutta stund áður en vatninu er bætt út í.
Látið suðuna koma upp og sjóða kröftuglega í um 3 mínútur.
Lækkið þá hitann og látið réttinn malla í um 15 mínútur.
Leggið fiskbitana ofan í hrísgrjónin og setjið humar eða risarækjur (í skel) ofan á.
Ekki hræra í paellunni á þessu stigi.
Paellan er tilbúin þegar fiskurinn og skelfiskurinn eru eldaðir og hrísgrjónin mjúk. Hrísgrjón sem festast og verða örlítið stökk á botninum eru talin mikið lostæti í paellu.
Látið paelluna standa í 5–10 mínútur áður en hún er borin fram.
Skreytið með sítrónubátum og smá ferskri persillu.
Vinir Margrétar drekka rauðvín með paellu en sjálfsagt er að bera hvítvín fram með þessum rétti.
— PAELLA — SPÁNN — MUNDO — HUMAR — MARGRÉT JÓNSD NJARÐVÍK —
🦞