Litla herramennskukverið kom út árið 2011. Höfundinum Kristni Árna Hróbjartssyni tekst afar vel að koma í orð fjölmörgu sem vel gagnast herramönnum á öllum aldri.
Herramaðurinn reynir með allir framkomu sinni og fasi að sýna því fólki sem hann umgengst og á í samskiptum við virðingu og kurteisi. Hann veit að það hjálpar honum, og að öðru fólki líður betur ef því er sýnd virðing. Hér á eftir fylgja nokkur atriði sem herramaðurinn hefur á hreinu.
Tímaskyn
Margir hafa vanið sig á þann hvimleiða ósið að vera seinir eða láta bíða eftir sér. Vendu þig á stundvísi þegar þú mælir þér mót við einhvern. Sömuleiðis ættir þú ekki að láta annað fólk bíða lengi eftir þér. Sýndu þeim að þeirra tími sé jafn mikilvægur og þinn með því að virða settar tímasetningar og standa við tímamörk. Það er fátt leiðinlegra en maður sem er alltaf seinn, ekki vera sá maður.
Sýndu gott siðferði
Ekki haga þér eins og fíll í margmenni. Kynþáttahatur, rembubrandarar, niðrandi tal um aðra og dónaskapur kemur yfirleitt verst út fyrir þann sem talar. Þröngsýni og vanþekking einkenna þá sem tala og hugsa með þeim hætti að þeir eiginleikar eru herramanninum ekki boðlegir.
Ekki hlæja að mistökum annarra
Fátt er jafn leiðinlegt og að gera mistök fyrir framan fólk sem bregst við með hlátri eða háði. Reyndu að sýna fólki tillitssemi og skilning þegar þeim mistekst því þá eru meiri líkur á að þau reyni aftur og takist þá í næstu tilraun.
Talaðu fallega
Reyndu að komast hjá því að nota blótsyrði eða önnur óviðeigandi orð í daglegu máli. Það eru til miklu betri orð til að lýsa mikilfengleika einhvers en „fokkings” eða „geðveikt”, enda er íslenskan auðugt mál. Blótsyrði eru ekki einungis dónaleg og ófáguð heldur gefa þau til kynna að þú ráðir ekki yfir nægum orðaforða til að geta tjáð þig almennilega.
Ekki skyrpa
Fátt er jafn óaðlaðandi og fólk sem skyrpir á almannafæri. Það er subbulegt og hvimleitt og fólki finnst það fráhrindandi. Sum lönd banna það að hrækja á almannafæri með lögum – hagaði þér alltaf eins og þú sért í einu af þeim löndum.
Ekki missa stjórn á þér
Það er mannlegt að verða reiður eða sár en algjörlega óþarfi að missa stjórn á skapi sínu. Ef þú sýnir að þú hafir ekki stjórn á eigin tilfinningum, hvernig á fólk að geta treyst þér til að stjórna einhverju öðru? Sýndu þroska, því yfirvegun er eitthvað sem fólk tekur eftir.
Ekki láta aðra sjá þig líta á úrið
Með því að líta á úrið þitt gefur þú til kinna að þér leiðist svo mikið að þér sért að leita þér að afsökun til að yfirgefa samkvæmið. Ekki gera það í hóp, sérstaklega ekki ef þú ert í miðjum samræðum. Ef þú ert tímabundinn, líttu þá á úrið án þess að aðrir sjái og afsakaðu þig áður en þú ferð.
Sýndu þakklæti
Að sýna öðru fólki þakklæti er líklega eitt það mikilvægasta sem þú gerir og greið leið að góðri þjónustu eða hjálp annarra. Flestir eru reiðubúnir að aðsoða aðra og þá skiptir miklu að þú sem þiggur hjálpina þakkir fyrir þig, því enginn hefur áhuga á að hjálpa vanþakklátu fólki. Það sama á við um fólk í afgreiðslu- og þjónustustörfum. Þau gera allt sem þau geta til að aðstoða þig, en hætta yfirleitt að nenna því sé þeim ekki sýnt þakklæti.
.
.
