Kaffihúsavinnufundir
Undanfarna mánuði höfum við Bergþór farið tvisvar til þrisvar í mánuði með tölvurnar okkar á kaffihús og haldið kaffihúsavinnufundi.
Á þessum fundum eru tekin fyrir praktísk mál, skrifuð „fundargerð” og farið yfir síðustu. Hvað er framundan, hringja í rafvirkjann og smiðinn, sumar-, jóla- og frí, veislur framundan, næsta útlandaferð og stórafmæli. Þetta eru dæmi um það sem við höfum tekið fyrir.
Nú höfum við tekið ákvörðun um að verja byrjun fundarins í hvernig við getum bætt almenn samskipti, t.d. að taka vel í hugmyndir, álitlegar sem óálitlegar og upplýsingaflæði. Það virðist nauðsynlegt fyrir fólk að taka sér sérstakan tíma í það, þar sem sagt er að hjón tali saman að meðaltali u.þ.b. 5 mín á mánuði um eitthvað sem máli skiptir.
Hugmyndin er vel þekkt og alls ekki okkar, um leið og búið er að skipta með sér verkum, þvælast heimilismálin ekki lengur fyrir daglegu lífi og hægt að einbeita sér að því að gera eitthvað skemmtilegt, búa til pizzu með gleði, ja, bara svona sem dæmi.
–
–
