Í veislu hjá Kjartani Smára og Hildigunni
Í einstaklega skemmtilegri ferð á Eurovision í Lissabon kynntumst við alveg ótrúlega hressu fólki. Í þeim hópi voru sómahjónin Kjartan Smári og Hildigunnur sem héldu matarboð um helgina. Á matseðlinum var lifrarterrine með súrdeigsbrauði og sultu, saltfiskréttur frá Grænhöfðaeyjum og Ambrosia ávaxtasalat
— KJARTAN SMÁRI — KÆFA – SÚRDEIGSBRAUÐ – SALTFISKUR – PORTÚGAL — EUROVISION —
.
Lifrarterrine að hætti veiðimannsins
Fyrir 10
550 g lifur (kjúklingalifur að öllu leyti eða að hluta á móti hreindýra-, rjúpna- eða gæsalifur fyrir extra villibráðarbragð)
1 laukur grófskorinn
2 stórir hvítlauksgeirar, grófsaxaðir
1 ½ tsk. timjan (þurrkað)
1 ½ tsk. marjoram (þurrkað)
1 dl portvín
½ dl brandí
2 tsk. borðsalt
1 tsk. nýmalaður pipar
250 g smjör
2 dl. rjómi
Setjið allt nema smjör og rjóma í eldfast mót og bakið í 150°C heitum ofni í 40 mínútur. Takið úr ofninum, skerið smjörið í sneiðar og dreifið yfir sjóðheitt mótið svo það mýkist. Hellið öllu úr eldfasta mótinu í matvinnsluvél eða blandara og maukið vel ásamt rjómanum.
Hellið í fallegt form eða krukkur og kælið í 4-6 klukkustundir. Má frysta hluta í lokuðu íláti.
Berið fram með góðri sultu, ristuðu brauði og jafnvel salati.
Saltfiskréttur forvitna flugstjórans frá Grænhöfðaeyjum
Fyrir 5
1.2 kg saltaðir þorskhnakkar (því stærri hnakkar, því betra)
1 stór sæt kartafla (ca 500g)
½ kg kartöflur
Vel af svörtum pipar
5 geiralausir hvítlaukar, saxaðir
2 litlar dósir tómatpúrra (3 ef dósirnar eru pínulitlar)
2 pelar rjómi
Safi úr 1 stórri sítrónu eða 2 litlum.
Hitið ofninn í hæsta hita (oft 275°c). Afhýðið sætkartöflu. Þekið botninn á stóru eldföstu móti með 1 cm þykkum sneiðum af sætkartöflu og þá öðru jafnþykku lagi af venjulegum kartöflum. Ath. ekki nota neina olíu eða aðra fitu. Piprið vel yfir.
Bakið kartöflurnar þar til þær byrja að bólgna út og stöku brunablettir eru farnir að láta sjá sig (ca. 20 mín). Dreifið hvítlauknum yfir kartöflurnar og lækkið hitann niður í 150°c. Bíðið þar til hvítlaukur verður fallega gylltur en hann má ekki brenna (ca.10 mín). Dreifið tómatpúrru yfir mótið og hellið öðrum rjómapelanum yfir. Hrærið aðeins svo púrra blandist við rjómann. Bakið í ca. 15 mín svo allt kraumi vel saman.
Hitið vatn að suðu í stórum potti eða pönnu. Roðflettið saltfiskhnakkana og látið þá varlega ofaní tæplega sjóðandi vatn í ca. 2 mín. Færið hnakkana varlega upp úr vatninu og leggið þá í heilu lagi ofan á mótið. Hellið seinni rjómapelanum yfir og bakið í 30 mín við 150°C.
Takið úr ofninum og kreistið sítrónu yfir saltfiskinn. Berið strax á borð í forminu og njótið!
Ambrosia ávaxtasalat með Pavlovu
Pavlova er dásamlegur eftirréttur frá Nýja Sjálandi, þó að Ástralir hafi nú aðeins reynt að eigna sér hann. Aftur á móti getur Pavlova verið flókin í að ná réttri, en þá má alls ekki örvænta þó illa fari, heldur nota afraksturinn í þennan frábæra eftirrétt sem kemur frá suðurríkjum Bandaríkjana,
Ambrosia ávaxtasalat
Uppskrift (á móti ca einni Pavlovu)
1 peli rjóma, þeyttur með smá sykri og vanilluextract
Ein stór dós kokteilávextir eða mismunandi ferskir ávextir.
Skerið niður pavlovu í bita og blandið saman við rjómann og ávextina með sleif. Setjið í skál(ar) og skreytið með ferskum berjum og kókósmjöli
.
— KJARTAN SMÁRI — KÆFA – SÚRDEIGSBRAUÐ – SALTFISKUR — EUROVISION — PORTÚGAL —
.
