Ítalskur veislumatur
Hulda Steinunn er nýlega flutt heim eftir nám á Ítalíu og Jón Freysteinn bjó þar á barnsaldri. Þau heilluðust að ítölskum mat, matarhefðum og góðum veitingastöðum. Bæði þegar við Bergþór fórum fyrst til Rómar og þegar við fórum seinna með hóp í sælkeraferð þangað fengum við fjölmargar gagnlegar upplýsingar hjá þeim hvert við ættum að fara og fleira. Antipasto, Pasta, Primo, Contorno og Dolce hljómar svo vel 🙂
.
– HULDA STEINUNN / JÓN FREYSTEINN — ÍTALÍA — PASTA — SALTFISKUR —
.
Bruschetta
-Baguette
-Hvítlaukur
-Tómatar
-Ólífuolía
-Basil
-Salt
-Pipar
Saxið niður tómata og basil, blandið saman í skál með ólífuolíu, salti og pipar.
Skerið þunnar sneiðar af baguette og ristið. Borið fram með hvítlauksrifum. Nuddið hvítlauk á brauðið eftir smekk og setjið tómatblönduna ofaná.
Hægt er að útbúa blönduna fram í tímann og geyma í ísskáp (2-4 tímum áður en borið er fram).
Tagliatelle del Magnifico
400 g Ferst pasta tagliatelle / fettuccine
250 ml rjómi
Rifin börkur ½ appelsínu
Rifin börkur ½ sítrónu
12 mintulauf
5 cl koníak
100 g Parmesan
salt
Sjóðið vatn og saltið vel.
Hitið rjóma, appelsínubörk, sítrónubörk, mintu og cognac á pönnu við miðlungs hita. Bætið pastanu á pönnuna þegar það er soðið (2-3 mín fyrir ferskt pasta) ásamt rifnum parmesan. Sé sósan of þykk skaltu bæta smá pasta vatni saman við.
Baccala` trasteverina
-Saltfiskur
-Hveiti
-Laukur
-Hvítlaukur
-Kapers
-Ansjósur
-Sultanas (ljósar rúsínur)
-Furuhnetur
-Steinselja
-Ólífuolía
-Salt
-Pipar
Þurrkaðu fiskbitana og veltu uppúr hveiti. Hitaðu pönnu á háum hita með ólífuolíu. Steiktu fisk þar til gullinbrúnn og leggðu í eldfast mót. Lækkaðu hitann á pönnunni niður í meðalhita og steiktu lauk og hvítlauk þar til hann verður mjúkur. Bætið saman við kapers, sultanes, furuhnetum og nokkrum ansjósum. Eftir nokkrar mín á pönnunni setjið yfir fiskinn og fatið inn í ofn á 220°C í nokkrar mín til að hita í gegn.
Spínat
-Spínat
-Ólífuolía
-Chili flögur
-Salt
-Pipar
Hitið stóra pönnu með ólífuolíu. Setjið spínatið á pönnuna og steikið þar til það hefur minnkað mikið, bætið þá salti, pipar og chili flögum.
Lime-, kókos- og rommís. Uppskrift fyrir 4-6 manns
200 ml rjómi
400 ml kókosmjólk
150 g sykur
75 ml limesafi
rifinn börkur af 2 lime
2 msk romm
Í þessari uppskrift er notast við ísgerðarskál, setja skal skálina í frysti daginn áður. Setjið rjóma, kókosmjólk og 100 g af sykri í pott. Hitið þar til sykurinn hefur leyst upp, kælið þá og frystið. Setjið 50 g af sykri, lime safann og börkinn í pott. Hitið þar til sykurinn hefur bráðnað, lækkið þá hitann þar til sýrópið hefur þykknað örlítið, kælið þá og frystið.
Þegar báðar blöndurnar eru hálffrostnar, blandið þeim þá saman í hrærivélaskál á meðalhraða, þar til þær hafa blandast vel saman og bætið romminu saman við. Hellið blöndunni í ísgerðarskálina og hrærið á lágum hraða þar til blandan er næstum því stíf. Setjið í ílát og geymið í frysti yfir nótt áður en ísinn er borinn fram.
.
– HULDA STEINUNN / JÓN FREYSTEINN — ÍTALÍA — PASTA — SALTFISKUR —
.
