Eitt af topp fimm hótelum á Íslandi er klárlega Hótel Húsafell. Frá opnun höfum við reglulega komið þangað og alltaf verið ánægðir.
Það er alltaf gott finnst mér að fara í matseðil dagsins, sérstaklega er spennandi ef um er að ræða „óvissuferð kokksins” Þá er það besta í boði, ferskasta hráefnið.
Seinna kvöldið okkar á Húsafelli var Davíð Örn Hákonarson yfirkokkur í eldhúsinu og galdraði fram hvern dásemdarréttinn á fætur öðrum. Þjónninn Gunnar Ingason stjanaði við gestina af stakri ljúfmennsku svo eftir því var tekið, ekki nóg með það, hann gaf sér góðan tíma í að spjalla og útskýra bæði matinn og líka eitt og annað í umhverfinu.
Framsýni einkenndi hönnun á hótelinu, auk þess sem það er sérlega glæsilegt og fellur vel inn í umhverfið, er það umhverfisvænt. Hér er sjálfbærni um kalt og heitt vatn og orku og því eftirsótt af umhverfisþenkjandi ferðamönnum.
Hringurinn um Hálsasveit og Hvítársíðu er ekki síður áhugaverður en Gullni hringurinn. Hér er Krauma, jarðböðin (við vatnsmesta hver Evrópu, Deildartunguhver), Geitfjársetrið á Háafelli, Víðgelmir (einn stærsti hraunhellir í heimi), makalaus náttúrufegurð, sögurölt, íshellaferðir, Barnafoss og Hraunfossar, auk alls þess sem Hótel Húsafell hefur upp á að bjóða, sundlaug, golfvöll, Giljaböðin o.m.fl.
— HÓTEL HÚSAFELL — GILJABÖÐIN — FERÐAST UM ÍSLAND —
— GÖNGULEIÐIR Í KRINGUM HÚSAFELL — GEITFJÁRSETUR — VÍÐGELMIR — SÖGURÖLT UM HÚSAFELL —
Hægt er að fara í íshelli á Langjökli á laugardögum kl. 12.30 frá Þjónustumiðstöðinni á Húsafelli. Hægt er að bóka á síðu Arctic Adventures eða í 562 7000
Við ferðaþríeykið viljum gjarnan heyra frá ferðaþjónustufólki
