Þegar haldið er af stað á ákveðinn áfangastað á landinu er tilvalið að fara aðeins fyrr af stað, velja sér útúrdúr og njóta lífsins á landinu okkar, sem býður upp á hverja perluna okkar Íslendinga á fætur annarri. Þær eru ekki bara við Þjóðveg 1. Vatnsnesið er eitt af þessum perlum og fyrstan skal frægan telja Hvítserk, sem ég hafði því miður aldrei augum litið nema á mynd fyrr en í dag. Hér eru selalátur, sögustaðir síðastu aftökunnar á Íslandi í upphafi 19. aldar og margt fleira.
— GEITAFELL — FERÐAST UM ÍSLAND —
Þó ekki væri nema fyrir Geitafell, er vel þess virði að fara Vatnsneshringinn og fá súpuna góðu hjá Sigrúnu og Guðbjörgu sem tóku ljúflega á móti okkur í gömlu fjóshlöðunni sem breytt hefur verið í heimilislegan veitingastað með ægifögru útsýni og fuglasöng í bland við yndislega söngfuglinn okkar Elly Vilhjálms í bakgrunninum. Við fórum upp í súrheysturninn, sem hefur verið gerður fallega upp, en þar gefur m.a. að líta vísi að safni um Man. Utd. sem eiginmaður Sigrúnar, Róbert Jón Jack setti upp. Og á þakinu er tilkomumikið að líta vestur á Strandir og Gjögur.
Við fengum okkur matar- og bragðmikila sjávarréttasúpu, sem var alveg sérlega ljúffeng. Með henni var heimabakað brauð og salat.
Á eftir fengum við okkur skyrtertu, hjónabandssælu og brownies. Og viti menn, eins sjaldgæft og það er, fullkomlega bakaðar Brownies, mátulega „seigar“ og stökkar. Því miður var ég svo gráðugur að ég gleymdi að mynda þær.
Á Geitafelli er einnig boðið upp á gistingu í þremur herbergjum.
Þarna er ein af mörgum leyndum perlum fyrir okkur innfæddum, en erlendir ferðamenn hafa hópast að undanfarin ár. Nú er sannarlega tími til að njóta og fara á kreik meðan kötturinn er að heiman!
Við ferðaþríeykið viljum gjarnan heyra frá ferðaþjónustufólki
