Átveislan mikla í Viðey
Ein stórkostlegasta veisla Íslandssögunnar var haldin í Viðey 27. júní 1809, daginn eftir byltingu Jörundar hundadagakonungs. Samkvæmt heimildum var vel veitt þennan dag — svo vel að gestirnir áttu fullt í fangi með að ljúka máltíðinni.
— HUNDADAGAR — VIÐEY — HUNDASÚRUR — LAX — JÖRUNDUR — VÖFFLUR — ROMM — DANMÖRK — ÁSTRALÍA — RÚGBRAUÐ —
.
Jörundur og föruneyti hans sigldu út í Viðey klukkan tíu um morgun í blíðskaparveðri. Þar tók tæplega áttræður Ólafur Stephensen, fyrrverandi stiftamtmaður, á móti þeim í dönskum foringjaeinkennisbúningi. Erindi þeirra var að afhenda Ólafi bréf frá vini hans og pennavini Banks baróni.
Gestirnir voru fyrst leiddir inn í hjónaherbergi þar sem þeim var boðið rommglas og norskt brauð. Síðan hófst ógleymanleg veisla.
Heldrimannamatseðillinn var ekki af verri endanum:
Sagósúpa soðin í rauðvíni og rúsínum
Heill flakaður lax með sósu úr bræddu smjöri, ediki og pipar
Tólf kríuegg á mann með þykkri rjómasósu
Hálfur sauður, vel steiktur, með hundasúrumauki
Tvær vöfflur á mann, „á stærð við bók í átta blaða broti“
Norskt kex, rúgbrauð og vænar brauðsneiðar
Vín, kaffi, rommpúns og te
Í bók Söruh Bakewell, Jörundur hundadagakonungur, er veislunni lýst á lifandi hátt. Fyrst kom sagósúpa úr rauðvíni og rúsínum, soðin nánast í mauk. Gestirnir borðuðu tvær skálar hver, enda töldu þeir að súpan væri sjálf máltíðin. Þá voru bornir inn tveir heilir laxar með smjör-, edik- og piparsósu.
En veislan var rétt að byrja. Næst kom skál full af harðsoðnum kríueggjum, tólf egg á mann með þykkri rjómasósu. Hooker baðst undan því að borða þau öll, en var hvattur til að reyna — og tókst það að lokum. Þá birtist „hálfur sauður, vel steiktur“, borinn fram með sætu hundasúrumauki.
Að lokum komu risavaxnar vöfflur, norskt kex, rúgbrauð, kaffi og rommpúns. Veislunni lauk svo á því að gestirnir drukku þrjá tebolla hver.
Til eru fjölmargar heimildir um stórar veislur í Viðey. Þar sátu höfðingjar og embættismenn, og gestagangur var mikill. Skúli Magnússon, Ólafur Stephensen og Magnús Stephensen tóku á móti heldri borgurum landsins og erlendum gestum með rausn sem lengi var í minnum höfð.
Heimildir: Fréttablaðið, Morgunblaðið, Tímarit.is og bók Söruh Bakewell um Jörund hundadagakonung.
Fleira áhugavert:
— Kubbasteik – Plokkfiskurinn góði – Hvítlaukskjúklingur – 25 vinsælustu uppskriftirnar frá upphafi – Hjónabandssæla – Hafragrautur —