Sítrónukaka með vanillurjóma og bláberja-compote
Hjördís Þráinsdóttir kom með sítrónuköku á hlaðborð Kvennakórs Ísafjarðar og studdist við uppskrift frá Nigellu Lawson. Kakan er óskaplega mjúk og safarík með fullkomnu jafnvægi af sætu og súru. Hún geymist vel og má gjarnan gera hana daginn áður en á að bera hana fram, jafnvel 2 dögum fyrr, og geyma hana í kæli. Ef notaður er jurtarjómi ofan á hana verður hún alveg vegan.
— SÍTRÓNUTERTUR — KVENNAKÓR ÍSAFJARÐAR — ÍSAFJÖRÐUR — NIGELLA —
.
Sítrónukaka með vanillurjóma og bláberja-compote
230 gr hveiti
1 1/2 tsk lyftiduft
1/2 tsk matarsódi
Örlítil klípa af salti
150 ml. matarolía
150 gr sykur
280 gr. kókosmjólk
Rifinn börkur af 2 sítrónum
50 ml. ferskur sítrónusafi
1 tsk vanilludropar
Blandið saman í skál olíu, sykri, kókosmjólk, sítrónusafa, sítrónuberki og vanillu – athugið, notið „full fat“ kókosmjólk og notið feitasta partinn, eða „rjómann“ sem sest ofan á í dósinni og svo kókosvatnið úr botninum til að fylla upp í 280 gr. Setjið þurrefnin saman við og hrærið vel. Bakið í vel smurðu 20 cm. Spring formi, við 180°C í 30-25 mínútur, eða þar til kakan er gullin á toppnum og bökuð í gegn. Látið hana svo kólna alveg.
Bláberja-compote:
150 gr. frosin bláber
1 msk sykur
1 msk sítrónusafi
50 ml vatn
1 ½ tsk maíssterkja
Setjið bláber, sykur, vatn og sítrónusafa í pott, látið suðuna koma upp og látið malla við vægan hita í nokkrar mínútur, þar til bláberin hafa mýkst. Blandið maíssterkju saman við 2 tsk af vatni og hellið út í pottinn, hrærið stöðugt í á meðan, þar til blandan hefur þykknað. Látið kólna.
Vanillurjómi:
250 ml. rjómi
1 kúfuð msk. flórsykur
1 tsk. vanilludropar
Þeytið rjómann með flórsykri og vanilludropum. Smyrjið honum ofan á kökuna, skreytið með rifnum sítrónuberki og ferskum bláberjum og berið fram með bláberja compote.
— SÍTRÓNUTERTUR — KVENNAKÓR ÍSAFJARÐAR — ÍSAFJÖRÐUR — NIGELLA —
.
