Jólaglaðningur
Hver hefur ekki lent í vandræðum með að finna gjöf fyrir þá sem „eiga allt”? Gjafir sem eyðast eru stórfínar, líka þær sem er hægt að borða. Undanfarin ár, svona rétt fyrir jólin, höfum við farið í bíltúr og fært nokkrum vinum og ættingjum smá jólaglaðning, matarjólaglaðning. Með fylgir útskýring í bundnu máli eftir tengdapabba, Pál Bergþórsson ásamt jóla- og nýárskveðju. Þetta er hin skemmtilegasta útkeyrsla og alls staðar er okkur boðið inn í hressingu. Hér má sjá nokkur dæmi um jólaglaðninginn síðustu ár.
🔔
— JÓLIN — PÁLL BERGÞÓRSSON — “EIGA ALLT” —
🔔
Jólin 2022: Flóruspilið, Bók allra árstíða og hollustu konfekt.
Jólatríó jólum á
jafnan er á ferli,
trítlar bæði til og frá
með tuðru í jólaerli.
🔔
Jólin 2021: Salt frá Saltverki á Reykjanesi og lýsi frá Dropa í Bolungarvík.
Vissulega má vænta þess
að með salla frá Saltverki Reykjaness
og Dropa af D-vítamíni
með deginum birti og hlýni.
P.B.
— SALTVERK — DROPI — BOLUNGARVÍK —
🔔
Jólin 2018: Svunta og súkkulaðijólatré
Svuntuna á þig settu
og jólatréð seinna jettu,
úr sætasta súkkulaði,
en ekki með of miklu hraði.
Hlýi þér hækkandi sólin.
Hafðu það gott um jólin
Jólin 2017: Vanilluexrakt og súkkulaði
Frá póli að pól
um byggðir og ból
berist með þessu blaði
vonir um sól
og vanillujól
og sælkerasúkkulaði.
Jólin 2016: Ber í rommi
Kannski er hægt að hugsa sér,
er hækkar blessuð sólin,
að ber í rommi bragðist þér
bara vel um jólin.
Við bjóðum líkast til Lemon curd
sem logagyllt seður hvern matarnörd,
því ofan á brauð má það alveg jeta
úr eggjum og smjeri að hætti Breta.
Jólin 2014: Steinaldabrauð
Hér kemur þjóðráð við hungursnauð:
Af hollustu þrungið STEINALDARBRAUÐ
og jólakrydd ljúffengt það bragðlaukum býður
og betur en flest gegnum þarmana líður.
Jólin 2013: Jólaleg bláberjasulta
Ef bláber og krækiber kremjið þið
og komið þeim saman í pott
með kanel og negul og vanillu við,
þá verður það hollt og flott.
Það eykur á jólanna fegurð og frið
að fá sér í munninn gott.
🔔
—JÓLAUPPSKRIFTIR — JÓLAGLAÐNINGUR — JÓLIN — PÁLL BERGÞÓRSSON — “EIGA ALLT” —
🔔🔔
