Dugnaðardömurnar Anna Kristín og Snædís Agla bökuðu súkkulaðitertu með Þristum og höfðu á henni krem með Þristum. Verulega góð terta
— ANNA KRISTÍN — SNÆDÍS AGLA — SÚKKULAÐITERTUR — ÞRISTAR —
Súkkulaði-þristaterta
400 g suðusúkkulaði
150 g smjör
1-2 msk hveiti
1/4 tsk salt
4 egg, aðskilin
1 tsk vanilludropar
2 msk sykur
1/2 poki af litlum þristum, skornir í bita (250g)
Þristakrem
1 poki af litlum þristum (250g)
4 msk rjómi
1/2 poki af þristum til að skreyta
(samtals 2 pokar af þristum fyrir alla kökuna)
Aðferð:
Hitið ofninn í 190°C. Smyrjið stórt hringlaga kökuform og setjið bökunarpappír í botninn.
Bræðið suðusúkkulaðið í skál yfir vatnsbaði. Takið svo skálina af hitanum og bætið við smjörinu, hveitinu og saltinu. Blandið vel. Bætið svo eggjarauðunum og vanilludropunum við og hrærið vel.
Þeytið eggjahvíturnar í annarri skál, setjið sykurinn svo í eggjahvíturnar og þeytið aðeins lengur þangað til þær eru stífar.
Setjið 1/3 af eggjahvítunum í súkkulaðiblönduna og hrærið vel. Bætið svo við restinni af hvítunum og hrærið varlega með sleikju. Blandið að lokum hálfum poka af þristum, í litlum bitum, við deigið.
Hellið deiginu í formið og bakið í 25 mín. Leyfið tertunni að kólna og takið hana svo úr forminu.
Kremið
Bræðið heilan þristapoka í potti og bætið 4 msk af rjóma saman við. Hellið kreminu á kökuna og skreytið hana svo með hálfum poka af þristabitum. Mjög gott að skreyta með jarðaberjum líka.
Það er mjög gott að borða tertuna með vanilluís þegar hún er ennþá svolítið volg en við mælum með að geyma tertuna í ísskáp og borða hana kalda.
–
–
