Bryggjukaffi á Flateyri
Þau ykkar sem hyggið á ferðalag um Vestfirði í sumar, eigið völ á þremur veitingastöðum á Flateyri. Þar á meðal er Bryggjukaffi, en þangað fórum við í sunnudagsbíltúr og nutum heimilislegra veitinga. Þetta er þriðja sumarið sem hjónin Sunna Reynisdóttir og Magnús Eggertsson reka Bryggjukaffi. Veggina prýða málverk eftir Magnús og allt er búið til á staðnum. Þarna er gott andrúmsloft og hægt að mæla með heimsókn þangað.
Ef við erum í meira „mat”stuði er hægt að fá sér matarmiklar súpur, fiskisúpa, harira súpa og chili-tómatsúpa. Súpa dagsins er alltaf vegan og er breytilegt hver hún er í dag voru tvær í boði, Harira og chilli tómat. Og öllu er hægt að skola niður með bjór, léttvíni og kaffidrykkjum.
Hægt er að fá sér harðfisk með smjöri, rúgbrauð með reyktum rauðmaga og vestfirska hveitiköku með hangikjöti, en auk þess venjulegra kaffimeðlæti, eins og vöfflur, döðlugott og kleinur.
Dásamlegar kökur, trúlega besta gulrótakaka landsins, vegan döðlukaka með karamellukremi, glútenlaus hjónabandssæla og rjómaostakaka, sem er með rjómaosti, ananassafa og bláberjum sem tínd voru á Kálfeyri í Önundarfirði.
— FLATEYRI — VEITINGASTAÐIR — ÍSLAND — ÖNUNDARFJÖRÐUR —
.
AÐ LOKUM: Okkur finnst mjög gaman að fara út að borða, smakka nýja rétti og deila með gestum síðunnar. Ef þið viljið umfjöllun er netfangið albert.eiriksson@gmail.com
— FLATEYRI — VEITINGASTAÐIR — ÍSLAND — ÖNUNDARFJÖRÐUR —
.
