Parmesan-ostakartöflur Margrétar
Þessar ljúffengu parmesan-ostakartöflur voru bornar fram í bráðskemmtilegu matarboði hjá Eddu Björgvins. Kartöflurnar verða mjúkar að innan en parmesanosturinn myndar stökka, salta og einstaklega góða skorpu undir þeim.
Uppskriftin er einföld og hentar parmesan-ostakartöflurnar vel sem meðlæti með kjöti, fiski eða grænmetisréttum. Best er að nota litlar og fallegar kartöflur, til dæmis íslenskar Þykkvabæjarkartöflur.
.
— EDDA BJÖRGVINS — KARTÖFLUR —
.
Parmesan ostakartöflur Margrétar
1 kg litlar góðar kartöflur
60–70 g smjör
2 bollar mjög fínt rifinn parmesanostur
Himalajasalt eða annað gott salt
Nýmalaður svartur pipar
Hvítlauksduft eftir smekk
Hitið ofninn í 180°C.
Þvoið kartöflurnar vel og þurrkið þær. Smyrjið eldfast mót ríflega með smjöri. Dreifið nokkuð þykku og jöfnu lagi af rifnum parmesanosti yfir botninn. Kryddið ostinn með salti, pipar og hvítlauksdufti.
Skerið kartöflurnar í tvennt og raðið þeim þétt í mótið með skurðflötinn niður á parmesanostinn.
Bakið kartöflurnar í 30–60 mínútur, eftir stærð þeirra og hita ofnsins. Þær eru tilbúnar þegar þær eru orðnar mjúkar í gegn og parmesanosturinn undir þeim er gullinn og stökkur.
Látið kartöflurnar standa í mótinu í nokkrar mínútur áður en þær eru losaðar varlega frá botninum og bornar fram.
Fleira áhugavert:
– Sætar kartöflur – Lambalæri – Bláber – Brauðtertur – Rúllutertur – Ananas –