Ferðaklúbburinn Tveir hommar og einn venjulegur

Svaraði nokkrum spurningum fyrir Ferðavef Morgunblaðsins

Það má segja að fjöl­breyti­leik­inn sé alls­ráðandi hjá þeim Al­bert Ei­ríks­syni og Bergþóri Páls­syni, mikið um að vera og verk­efn­in ólík.

Blaðamaður sló á þráðinn til Al­berts og bað hann að segja frá sumr­inu og því sem er framund­an.
„Fyrr í sum­ar dvöld­um við í Póllandi, nut­um þess að slaka á í Var­sjá og borða þar góðan mat. Ferðin var fyrst og fremst af­slöpp­un­ar­frí” seg­ir Al­bert og bætti við að hluti af frí­inu hafi líka farið í að skipu­leggja sum­arið og haustið. „Núna vor­um við ásamt Braga, syni Bergþórs og hans fjöl­skyldu, að koma heim eft­ir nokkra sól­ríka daga á Spáni. Það gam­an að upp­lifa sól­ar­landa­ferð með tveim­ur orku­mikl­um börn­um sem veita eng­an af­slátt og vilja hafa afa sína með í öllu, all­an dag­inn.“
Al­bert og Bergþór eru af mörg­um vel kunn­ir fyr­ir veisl­ur sín­ar enda hafa þeir mikla unun af mat­ar- og kaffi­boðum. „Upp­hafið var að til okk­ar hringdi kona úr banka fyr­ir nokkr­um árum og óskaði eft­ir að koma með deild­ina sína í mat til okk­ar. Við urðum eitt spurn­ing­ar­merki yfir þess­ari ósk en slóg­um til. Síðan tök­um við af og til á móti hóp­um og höld­um veisl­ur. Núna eru að koma til okk­ar kon­ur í síðdeg­iskaffi­boð í anda hinna bresku High Tea. Þá eru dregn­ir fram þriggja hæða kökudisk­ar og þeir hlaðnir að góðgæti milli þess sem er skálað, sungið sam­an og farið í leiki,“  seg­ir mat­ar- og kurt­eis­is­blogg­ar­inn Al­bert sem held­ur úti einni vin­sæl­ustu mat­ar­bloggsíðu lands­ins. Auk þess fá þeir til sín gæsa­hópa og þá er farið yfir nokk­ur góð ráð sem nýt­ast brúðhjón­un­um þegar kem­ur að stóra deg­in­um.

Árlega á þjóðhátíðardag­inn klæða þeir hjón­in sig upp í þjóðbún­ing­ana sem Bergþór saumaði og spíg­spora um miðbæ­inn. Er­lend­ir ferðamenn eru him­in­lif­andi að sjá „lif­andi fólk“ í ís­lensk­um bún­ing­um. „Háls­klút­inn, sem er hluti af karlbún­ingn­um, á að hnýta á ákveðinn hátt og ein­hvern veg­inn náum við þessu aldrei al­veg. Það ger­ist ár­lega að elsku­leg­ar kon­ur í þjóðbún­ing­um koma og bjóðast til að hnýta klút­inn svo hann verði fal­legri. Okk­ur til mik­ill­ar skemmt­un­ar köll­um við þær þjóðbún­inga­lögg­ur,“ seg­ir Al­bert hlæj­andi og bæt­ir við að tengdafaðir hans, Páll Bergþórs­son, hafi sleg­ist í för og fagnað því að þann 17. júní voru liðin 75 ár frá því hann út­skrifaðist úr MR. Útskrift­in var um morg­un­inn, að henni lok­inni var skundað á Þing­völl og lýðveld­inu fagnað.

Hvernig skipu­leggið þið sum­ar­frí­in?
„Í gegn­um tíðina hef­ur eng­in regla verið á þessu hjá okk­ur. Í fjöl­mörg ár rak ég kaffi­hús og safn um franska sjó­menn á Fá­skrúðsfirði. Sum­ar­frí­in fóru í að taka á móti ferðamönn­um og baka rabarbarapæ og fleira með kaff­inu. Í fyrra var ég að vinna á sum­ar­hót­eli í Breiðdal í góða veðrinu sem var þar. Í sum­ar ætl­um við að láta kylfu ráða kasti og fara í styttri ferðir inn­an­lands. Njóta lífs­ins með góðu fólki og bjóða okk­ur í kaffi hingað og þangað og birta upp­skrift­irn­ar á mat­ar­blogg­inu. Svo verða ef­laust nokkr­ir veit­ingastaðir víðsveg­ar um land heim­sótt­ir og skrifað um þá á bloggið. Svo erum við dug­leg­ir að hjóla og hreyfa okk­ur. Eig­um til að vakna fyr­ir all­ar ald­ir og ganga á Esj­una eða hjóla stór­an hring um höfuðborg­ina. Eitt af því sem við ætl­um að gera í sum­ar er að fara um há­lendið, slétt­um tutt­ugu árum frá því við fór­um síðast. Þá var með okk­ur syst­ur­son­ur minn á viðkvæm­um ung­lings­aldri. Um miðnætti vor­um við við Öskju og keyrðum eft­ir það norður. Það gleymd­ist al­veg að skipu­leggja gist­ingu svo Bergþór hóf að hringja og at­huga hvort ekki væri laust. Í gríni sagði ég við hann að panta fyr­ir þrjá homma. Þá heyrðist frá ung­lingn­um í aft­ur­sæt­inu með hneyksl­un­ar­tón: NEI!! Tvo homma og einn venju­leg­an! Síðan hef­ur þessi „ferðahóp­ur“ verði kallaður Tveir homm­ar og einn venju­leg­ur.“

Ein­hverj­ar hug­mynd­ir til að deila?
„Skipu­leggja sum­arið vel og með góðum fyr­ir­vara. Leyfa öll­um fjöl­skyldumeðlim­um að koma með hug­mynd­ir og vinna svo úr þeim. Það þarf ekki allt að kosta mikið. Oft er sam­ver­an það skemmti­leg­asta, fara í ís­bíltúr, fjöru­ferð, „út í blá­inn“ eða nest­is­ferð. Sum­arið er stutt og í raun er lífið mjög stutt. Njót­um sum­ars­ins og njót­um lífs­ins á meðan hægt er og eins vel og hægt er. Hugs­um stórt og lát­um draum­ana ræt­ast.”

.

— TVEIR HOMMAR OG EINN VENJULEGUR —

.